ރާއްޖޭގެ ކަނޑުގެ ސަރަހައްދު 24 ގަޑިއިރު ބެލެހެއްޓޭނެ ނިޒާމެއް ވަރަށް އަވަހަށް ގާއިމުވެގެން ދާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.
ރ. މީދޫގައި ރޭ ބޭއްވި ޖަލްސާއެއްގައި އެ މަނިކުފާނު ވިދާޅުވީ، އިގުތިސާދީ ފުޅާކުރުމަށް އޮތް ބިޔަ ބޮޑު ސަރަހައްދަކީ ރާއްޖޭގެ 99 ޕސެންޓް ކަމަށެވެ. އެކަމަކު މިއަދާ ހަމައަށް ކަނޑުގެ ބޮޑު ސަރަހައްދު އެކަށީގެންވާ ގޮތެއްގައި ބެލެހެއްޓެމުން ނުދާ ކަމަށް ވިދާޅުވި އެވެ.
ނަމަވެސް މި ސަރުކާރުން އެކަން ކުރާނެ ކަމަށް ރައީސް ވިދާޅުވި އެވެ.
"މި ރަށްތަކުގެ އެތެރޭގައި މިއޮތް، އަތޮޅުތަކުގެ އެތެރެވަރީގައި މިއޮތް ސަރަހައްދެއް މި ބެލެހެއްޓެންނާ ބެލެހެއްޓެނީ ވެސް. އެއީ އަޅުގަނޑުމެންގެ ކެޕޭސިޓީ ޒަމާނުއްސުރެން އޮތް ވަރު،" ރައީސް ވިދާޅުވި އެވެ. "އެހެންވެ މިއޮތް ބޮޑު ސަރަހައްދުން އެހެން ބަޔަކު ވަދެ ބޭނުމެއް ކުރިޔަސް، ހަގީގަތުގައި އަޅުގަނޑުމެން ކުރާނެ ކަމެއް ނެތް."
ރައީސް ވިދާޅުވީ ކަނޑު ބެލެހެއްޓުމުގައި ރާއްޖޭގެ މިހާރުގެ ހާލަތު އޮތް ރާއްޖޭގެ ކަނޑުގެ ސަރަހައްދަށް ކޮންމެ ބަޔަކު ވަދެ ގައުމު ނުރައްކަލަކާ ކުރިމަތިވެދާނެ ފަދަ ކަމެއް ކުރިޔަސް، އެހެން ބައެއްގެ އެހީތެރިކަމަކާ ނުލައި ކުރެވޭނެ އެއްވެސް ކަމެއް ވެސް ނޯންނާނެ ކަމަށެވެ.
އެހެންވެ މިކަމަށް ރާއްޖޭގެ ގާބިލުކަން އިތުރުކޮށް މި މަހުގެ ތެރޭގައި ރާއްޖޭގެ ކަނޑުގެ ސަރަހައްދު 24 ގަޑިއިރަށް ބެލެހެއްޓޭނެ ނިޒާމެއް ގާއިމުކުރުމުގެ މަސައްކަތް ފައްޓަވާނެ ކަމަށް ރައީސް ވިދާޅުވި އެވެ.