ގަވާއިދާ ހިލާފަށް ޕާކްކުރާ ވެހިކަލްތަކުގައި ޕާކިން ވައިލޭޝަން ސްޓިކާ ޖަހަން ނިންމާފައިވާ ކަމަށް ބުނެ ދެކެވޭ ވާހަކަތައް ފުލުހުން ދޮގުކޮށްފި އެވެ.
ފުލުހުން ރޭ ނެރުނު ބަޔާނެއްގައި ބުނީ އެކަމަށް އިޝާރާތް ކުރާ މާއްދާތަކަކީ ޓޯ ކުރުމުގެ މާއްދާ އާއި ޕާކިން ވައިލޭޝަން ސްޓިކާ ޖަހާ ހާލަތްތައް ފިޔަވާ ގަވާއިދާ ހިލާފުވާ ފަރާތްތައް ޖޫރިމަނާ ކުރުމުގެ މާއްދާއެއް ކަމަށެވެ.
އެހެންވެ މިކަމާ ގުޅިގެން ޚަބަރުތައް ރިޕޯޓް ކުރުމުގައިސަމާލުކަން ދިނުމަށް އެދިފައިވެ އެވެ.
މާލެ ސަރަހައްދުގައި ގަވާއިދާ ހިލާފަށް ޕާކްކުރާ ވެހިކަލްތަކަށް އަންނަ ބުރާސްފަތި ދުވަހުން ފެށިގެން ފިޔަވަޅު އަޅަން ވަނީ ނިންމައިފަ އެވެ. ފުލުހުން ބުނީ މަގުމަތީގައި ހިނގާ މީހުންނާއި ދުއްވާ ވެހިކަލްތަލަ ދަތިވާ ގޮތަށް ގަވާއިދާ ހިލާފަށް ޕާކު ކުރަމުންދާ މައްސަލަ ވަރަށް ބޮޑަށް ފާހަގަ ކުރެވިފައި ވާކަމަށެވެ. އެހެންވެ އެހެންކަމުން، މާލެ އާއި ހުޅުމާލޭގައި ފުލުހުން ކަނޑައަޅާ ތަނެއްގައި ނޫނީ ޕާކް ނުކުރުމަށް އިލްތިމާސްކޮށް ފުލުހުން ބުނީ، ބައެއް ސަރަހައްދުތަކުގައި ގަވާއިދާ ހިލާފަށް ޕާކު ކުރޭތޯ ބަލާނެ ކަމަށެވެ.
އޭގެ ތެރޭގައި ހިމެނެނީ ގްރީން ޒޯން، ޕަބްލިކް ޓްރާންސްޕޯޓް ދުއްވާ މަގުތައް، މަގުތަކާއި ގޯޅިތަކުގެ ކަންމަތި، ސްކޫލުތައް ހިމެނޭ ސަރަހައްދުތަކާއި އޮފީސް އިމާރާތްތަކާއި، ހޮސްޕިޓަލުތަކާއި ހާއްސައެހީ އަށް ބޭނުންވާ މީހުންނަށް ހާއްސަކޮށްފައިވާ ތަންތަނާއި، މިސްކިތްތަކާއި، އާއްމު ގޭބިސީތަކާއި ގަރާޖުތަކުން ވަދެނުކުމެ އުޅޭ ތަންތަން ހިމެނެ އެވެ.