ފައިސާގެ މުއާމަލާތްތަކެއްގެ މައްސަލައެއްގައި ކާށިދޫ ދާއިރާގެ މަޖިލިސް މެންބަރު އަބްދުﷲ ޖާބިރުގެ ބޭންކް އެކައުންޓްތައް ފްރީޒްކުރަން މިދިޔަ މަހުގެ ތެރޭގައި ސިވިލް ކޯޓުން ނެރުނު އަމުރު ބާތިލުކޮށްފި އެވެ.
އަމުރު ބާތިލުކުރީ އެ މުރާޖައާ ކުރުމަށް ފަހު ކަމަށް ސިވިލް ކޯޓުން ބުންޏެވެ. އަމުރު ބާތިލުކުރި އިރު، ޖާބިރުގެ ޣައިރުހާޒިރުގައި ފުރަތަމަ ނެރުނު ވަގުތީ އަމުރު މުރާޖައާކޮށް ދިނުމަށް އޭނަގެ ފަރާތުން އެދުމުން، އެކަމާ ގުޅިގެން އަޑުއެހުމެއް ވެސް ބޭއްވި އެވެ.
ޖާބިރުގެ އެކައުންޓްތަކެއް ފްރީޒްކުރަން އަމުރު ނެރުނީ މެރިން ޓެކްނޮލޮޖީ މޯލްޑިވްސް ނަމަކަށް ކިޔާ ކުންފުންޏެއްގެ ހިއްސާ ގަތުމަށް ވި އެއްބަސްވުމެއްގެ ދަށުން، ޖާބިރު ދައްކަން ޖެހޭ ފައިސާއެއް ނުދީގެން ހުށަހެޅި މައްސަލައަކާ ގުޅިގެންނެވެ.
ސިވިލް ކޯޓަށް ހުށަހެޅި މައްސަލާގައި ވަނީ އެއްބަސްވުމުގެ ދަށުން ޖާބިރު 750،000 އެމެރިކާ ޑޮލަރު ދައްކަން ޖެހޭ ކަމަށާއި އެއިން މިހާތަނަށް ދައްކާފައި ވަނީ 100،000 ޑޮލަރު ކަމަށެވެ. އެހެންވެ ކޯޓަށް ހުށަހެޅި މައްސަލާގައި އެދިފައި ވަނީ ބާކީ ނުދައްކައި އޮތް 600،000 ޑޮލަރު ހޯދުމަށެވެ. އަދި އެ މައްސަލަ ކޯޓުން ނިމެންދެން އެ އެކައުންޓުތައް ފުރީޒުކޮށްދޭން އެދިފަ އެވެ.
އެކަމާ ގުޅިގެން ޖާބިރުގެ އެކައުންޓްތައް ފްރީޒްކުރަން ވަގުތީ އަމުރެއް ނެރުނީ މައްސަލަ ނިމެންދެން ކަމަށް ބުނެފައިވެ އެވެ. އެގޮތުން ޖާބިރުގެ ނަމުގައި ހުޅުވާފައިވާ ބޭންކު އެކައުންޓުތަކުގެ އިތުރުން އޭނަގެ މަސްލަހަތު ހިމެނޭ ބައެއް ކުންފުނިތަކާއި ރިސޯޓު ވިޔަފާރިއާ ގުޅޭ އެކައުންޓުތަކެއް ފުރީޒުކުރުމަށް އެންގި އެވެ.
އޭގެ ތެރޭގައި އިންޓަނޭޝަނަލް ޓްރެވެލް ކޮންސަލްޓެންޓް ޕްރައިވެޓް ލިމިޓެޑާއި، ޖޭ ހޮޓެލްސް އެންޑް ރިސޯޓްސްގެ އެކައުންޓްތައް ވެސް ހިމެނެ އެވެ. އަދި އެ އެކައުންޓުތަކުގައި 600،000 ޑޮލަރު ހިމެނޭ ނަމަ، އެ އަދަދަށް ފްރީޒް ކުރުމަށާއި އެ އަދަދަށް ވުރެ ކުޑަ އަދަދެއް ހިމެނޭ ނަމަ، އެ އަދަދު އެއްކޮށް ފްރީޒް ކުރުމަށް ވެސް އަމުރުގައިވެ އެވެ.
ސިވިލް ކޯޓުން އަމުރު ނެރުނީ ޖާބިރު ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އާއި ސްޓޭޓް ބޭންކް އޮފް އިންޑިއާ (އެސްބީއައި) އާއި، ބޭންކް އޮފް ސިލޯނާއި ކޮމާޝަލް ބޭންކް އޮފް މޯލްޑިވްސް (ސީބީއެމް) އާއި، ދަ މޮރިޝަސް ކޮމާޝަލް ބޭންކް (އެމްސީބީ) އާއި އަދި ހޮންކޮން އެންޑް ޝަންހާއީ ބޭންކިން ކޯޕަރޭޝަން (އެޗްއެސްބީސީ) ގައި ހުޅުވާފައިވާ އެކައުންޓްތައް ފްރީޒްކުރުމަށެވެ.