މިދިޔަ ސަރުކާރުގައި ހުޅުމާލެ އިން އެކި މީސްމީހުންނަށް ނުހައްގުން ބިންތައް ދީފައިވާ ކަމަށާއި އެ މީހުންގެ ނަންތައް ވެސް ހާމަކުރައްވާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވެއްޖެ އެވެ.
ޕީޕީއެމް/ޕީއެންސީން ކޯލިޝަނުން ރޭ ބޭއްވި ޖަގަހަ ޖަލްސާއެއްގައި އޭނަ ވިދާޅުވީ އޭނާ އެޗްޑީސީއާ ހަވާލުވުމަށް ފަހު ދެވަނައަށް ކުރެއްވި މަސައްކަތަކީ ހުޅުމާލެއިން ދޫކުރި ބިންތަކަށް ވީ ގޮތެއް ބެލުން ކަމަށެވެ. އެގޮތުން ރައީސް އިބްރާހީމް މުހައްމަދު ސޯލިހުގެ ސަރުކާރުގައި ހިންގި "ބިންވެރިޔާ" ސްކީމުގެ ދަށުން ވިޔަފާރީގެ އުސޫލުންނާއި ނުހައްގުން 50 ބިން ދޫކޮށްފައިވާ ކަމަށް ފަޒުލް ވިދާޅުވި އެވެ.
"ހުޅުމާލޭގެ ދެ ފޭހުން ކީއްކުރަންތޯ ނުހިއްކައި އޮތް ތަނުން ވެސް ގާތްގަނޑަކަށް 50 އަކަށް ބިން މި އޮތީ އެކިއެކި މީހުންނަށް ދީ ހަލާސްކޮށްލާފައި." އޭނަ ވިދާޅުވި އެވެ.
ފަޒުލް ވިދާޅުވީ މި ވާހަކަތައް ތަކުރާރުކޮށް ދައްކަން ޖެހޭ ކަމަށާއި މިކަން މިރައްޔިންނާއި ހަމައަށް ނުގެނެސް ދެން ކުރިޔަށް ދެވެން ނެތް ކަމަށެވެ. އަދި އެ ނުހަްގުން ބިންތައް ދޫކުރީ ކޮން ބަޔަކަންވެސް އާންމު ކުރައްވާނެ ކަމަށް ވިދާޅުވި އެވެ.
"އެ ފަރާތްތަކުގެ ނަންތައް ވެސް އަޅުގަނޑުމެން ހާމަކުރާނަން." ފަޒުލް ވިދާޅުވި އެވެ.