ސަރުކާރުގެ ކުންފުނިތަކުން މުވައްޒަފުންނަށް ރޯދަ އިނާޔަތް ދޭން ވަނީ ކޭޝް ފްލޯއަށް އަސަރު ނުކުރާ ގޮތަށް ބަލައިގެން ކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގައިފި އެވެ.
ރޯދަ އިނާޔަތުގެ ފައިސާ ދިނުމުގައި އަމަލުކުރުމާ ގުޅޭ ގޮތުން ނެރުނު ސާކިއުލާއެއްގައި އެތަނުން ބުނީ ވަޒީފާއާ ބެހޭ ގާނޫނުގައިވާ ގޮތަށް ވަޒީފާ އަދާކުރާ ކޮންމެ މުވައްޒަފަކަށް ރޯދަަ މަހުގެ އިނާޔަތުގެ ގޮތުގައި 3000 ރުފިޔާ ދޭން ޖެހޭ ކަމަށެވެ. ސާކިއުލާގައިވާ ގޮތުގައި މުސާރަ ލިބޭ ގޮތަށް އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތުގެ ފައިސާދޭ އިރު އެ މުވައްޒަފަކަށް އިނާޔަތް ދޭނީ ހަމައެކަނި އެ މުވައްޒަފެއްގެ އަސާސީ ވަޒީފާ އޮންނަ އޮފީހަކުންނެވެ.
ޕީސީބީން ބުނީ ރޯދަ މަސް ފެށޭއިރު "ޕޭ ލީވް" ސްކޮލަޝިޕް މުވައްޒަފުންނާއި "ނޯ ޕޭ ލީވް" ގައި ތިބޭ މުވައްޒަފުން އިނާޔަތް ލިބޭ މުވައްޒަފުންގެ ތެރޭގައި ނުހިމެނޭނެ ކަމަށެވެ. އެކަމަކު އެފަދަ ލީވެއްގައި ހުރި މުވައްޒަފަކު ރޯދަ މަހު އަނބުރާ އޮފީހަށް ނުކުމެއްޖެ ނަމަ އެ ދުވަހަކުން ފެށިގެން ރޯދަ މަސް ނިމުނާ ހަމަޔަށް ޖެހޭ އަދަދަށް އިނާޔަތުގެ ފައިސާ ދޭން ޖެހޭނެ ކަމަށެވެ.