މޯލްޑިވްސް މީޑިއާ ކައުންސިލް އެމްއެމްސީ) އިން އާންމު މެންބަރެއްގެ މަގާމު ހުސްވުމާ ގުޅިގެން އެ މަގާމަށް ކުރިމަތިލާން ހުޅުވާލައިފި އެވެ.
އާންމު މެންބަރު ކަމަށް ކުރިމަތިލެވޭނީ މީޑިއާއާ ގުޅުން ހުރި އެއްވެސް ދާއިރާއެއްގައި މަސައްކަތް ނުކުރާ މީހަކަށެވެ. ކައުންސިލުގެ މެންބަރުންގެ މުއްދަތަކީ ދެ އަހަރެވެ. އެމްއެމްސީން ބުނީ އާންމު މެމްބަރު ކަމަށް ކުރިމަތިލެވޭނީ ވަކި ޝަރުތުތަކެއް ހަމަވާ މީހުންނަށް ކަމަށެވެ.
އެ ޝަރުތަކަކީ މިއީ:
* ދިވެއްސަކަށްވުން.
* އުމުރުން 18 އަހަރު ފުރިފައިވުން.
* އިސްލާމް ދީނުގައި ޙައްދެއް ކަނޑައެޅިފައިވާ ކުށެއް ކުރިކަން ޝަރީއަތަށް ސާބިތުވެފައިވާ މީހަކަށް ނުވުން.
* މަސްތުވާތަކެތީގެ ވިޔަފާރިކުރުމުގެ ކުށް ސާބިތުވެފައިވާ މީހަކަށް ނުވުން.
* ކުޑަކުދީންނަށް ޖިންސީ ގޯނާކުރުމުގެ ކުށް ޝަރީޢަތަށް ސާބިތުވެފައިވާ މީހަކު ކަމުގައި ނުވުން.
* ވޭތުވެ ދިޔަ 2 އަހަރު ދުވަހުގެ ތެރޭގައި ޖިނާޢީ ކުށެއް ކުރިކަން ޝަރީއަތަށް ސާބިތުވެފައިވާ މީހަކަށް ނުވުން.
* ޚިޔާނާތުގެ ނުވަތަ ރިޝްވަތުގެ ކުށެއް ކުރިކަން ޝަރީޢަތަށް ސާބިތުވެފައިވާ މީހަކަށް ނުވުން.
* މުޖުތަމަޢު ޤަބޫލުކުރާ މިންގަނޑުތަކުން، އަބުރުވެރި، އަޚްލާޤު ރަނގަޅު މީހަކަށްވުން
* ފާއިތުވި 12 މަސްދުވަހުގެ ތެރޭގައި ނޫސް މަޖައްލާއެއްގައި އެމީހަކު ލިޔުނު އެއްޗަކާބެހޭ ގޮތުން ޝަރީޢަތަށް ކުށެއް ސާބިތުވެފައިވާ މީހަކަށް ނުވުން.
އެމްއެމްސީން ބުނީ އާންމު މެންބަރުކަމަށް ކުރިމަތިލާ މީހުްގެ ތެރެސިން މެމްބަރަކު ހޮވުމުގައި ދެ ކަމަކަށް އިސްކަން ދޭނެ ކަމަށެވެ. އެގޮތުން ޤާނޫނީ ދާއިރާއިން ނުވަތަ ދިވެހި ބަހުގެ ދާއިރާއަކުން ނުވަތަ އިންސާނީ ޙައްޤުތަކުގެ ދާއިރާއިން ނުވަތަ ދީނީ ޢިލްމުގެ ދާއިރާއިން ނުވަތަ އިޖްތިމާޢީ ސައިންސަސް ގެ ދާއިރާއަކުން މަތީ ތަޢްލީމު ޙާޞިލްކޮށްފައިވުން ނުވަތަ އިޖުތިމާޢީ ތަރައްޤީއާއި ދުޅަހެޔޮކަމުގެ ދާއިރާ އިން ތަޖުރިބާ ލިބިފައިވުން ހިމެނެ އެވެ.
މެމްބަރުކަމަށް ކުރިމަތިލުމުގެ ސުންގަޑި އަކީ މި މަހުގެ 14 އެވެ.