ބިޒްނަސް ސެންޓަ ކޯޕަރޭޝަން (ބީސީސީ) އިން ގާއިމުކުރަން ނިންމާފައިވާ ކްރިއޭޓަ ހަބްގެ މަސައްކަތް ފަށައިފި އެވެ.
ސަލްޓަން ޕާކްގައި ރޭ ބޭއްވި ރަސްމިއްޔާތެއްގައި އެ އިމާރާތުގެ ބިންގާ އަޅުއްވައި ދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
ކްރިއޭޓަ ހަބަކީ ރާއްޖޭގައި ފަންނުވެރި އިގުތިސާދެއް ބިނާކުރުމަށް ކެބިނެޓްގައި މަޝްވަރާކުރުމަށް ފަހު ރައީސް ޑރ. މުހައްމަދު މުޢިއްޒު ނިންމަވާފައިވާ ކަންކަމުގެ ގެ ތެރޭގައި ހިމެނޭ ތަނެކެވެ.
އެގާރަ ބުރިއަށް އިމާރާތްކުރާ، ކްރިއޭޓަ ހަބް ވާނީ ފަންނުވެރިކަމުގެ ސިނާއަތުގައި ޙަރަކާތްތެރިވާ ފަރާތްތަކަށް ފަސޭހައިން މަސައްކަތް ކުރެވޭނެ މަސައްކަތު ޖާގަތަކާއި ފަންނުވެރިން މަސައްކަތްތައް ކުރިއެރުވުމަށް ބޭނުންވާ ގިނަ ވަސީލަތްތައް ފަހިވާނެ ތަނަކަށް ބީސީސީން ބުންޏެވެ.
ކްރިއޭޓަ ހަބް ޑިޒައިންކޮށް އިމާރާތް ކުރުމުގެ މަސައްކަތް ފެޑޯ ޕްރައިވެޓް ލިމިޓެޑާ ހަވާލުކުރީ މިދިޔަ މަހުގެ 15 ގަ އެވެ. މި މަސައްކަތް އެ ކުންފުންޏާ މަސައްކަތް ހަވާލުކުރީ ޑިޒައިން އެންޑް ބިލްޑް އުސޫލުން 400 ދުވަހުގެ ތެރޭގައި ތަން ނިންމާ ގޮތަށެވެ.
ކްރިއޭޓަ ހަބް ހުޅުވަން ހަމަޖެހިފައި ވަނީ އަންނަ އަހަރުގެ މެދުތެރޭގަ އެވެ.