މިދިޔަ ސަރުކާރުގައި ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ) ގައި ހިންގާފައިވާ ކަމަށް ބުނާ ނާޖާއީޒު ފައިދާތަކެއްގެ މައްސަލަ އެ ކުންފުނިން އެންޓި-ކޮރަޕްޝަން ކޮމިޝަން (އޭސީސީ) އަށް ހުށަހަޅަން ނިންމައިފި އެވެ.
ރައީސް ޑރ. މުހައްމަދު މުއިއްޒު އަތޮޅުތެރެއަށް ކުރައްވަމުން ގެންދަވާ ދަތުރުގެ ތެރެއިން ރޭ ވ. ފެލިދޫ ޖަލްސާގައި ބައިވެރިވެވަޑައިގެން އެ ދާއިރާގެ ކުރީގެ މަޖިލިސް މެންބަރު އަދި އެޗްޑީސީގެ މިހާރުގެ މެނޭޖިން ޑިރެކްޓަރު މުހައްމަދު ފަޒުލް ރަޝީދު ވިދާޅުވީ މި ސަރުކާރުން އެޗްޑީސީއާ ހަވާލުވި އިރު ކުންފުނީގެ ދަރަނި 10 ބިލިއަން ރުފިޔާ އަށް އަރާ ކަމަށެވެ. އަދި 800 މިލިއަނެއްހާ ރުފިޔާ ކުންފުންޏަށް ލިބެން ޖެހޭ ކަމަށާއި ނަމަވެސް ފާއިތުވެ ދިޔަ ފަސް އަހަރުގެ ތެރޭގައި އެ ފައިސާ ހޯދުމަށް އެއްވެސް މަސައްކަތެއްކޮށްފައި ނެތް ކަމަށް ވިދާޅުވިއެވެ.
ފަޒުލް ވިދާޅުވި ގޮތުގައި ކުރީގެ ރައީސް އިބްރާހީމް މުހައްމަދުގެ ސަރުކާގައި އެޗްޑީސީގެ ތެރޭގައި ހިންގާފައިވާ ނާޖާއީޒު މުއާމަލާތްތަކާ ގުޅޭ އޮޑިޓެއް ހެދުމުގެ މަސައްކަތް ވެސް މިހާރު އަންނަނީ ކުރަމުންނެވެ. އެހެންވެ އެކަން ނިމުމުން އެ އޮޑިޓް ރިޕޯޓް ހިއްސާކުރަން ޖެހޭ ފަރާތްތަކާ ހިއްސާ ކުރާނެ އެވެ.
"މި ދަރަނި ހިންގި ބަޔަކު ނޫނީ މި ދަރަނި މިހާ ހިސާބަށް ގެނައި ބަޔަކު އެބަވޭ. މިކަންކަމަށްޓަކައި ޒިންމާ ވާން ޖެހޭ ފަރާތްތަކެއް އެބަވޭ. އަޅުގަނޑުމެންގެ އޮޑިޓް ރިޕޯޓްތައް ހެދެމުން ދަނީ،" ފަޒުލް ވިދާޅުވި އެވެ. "ބައެއް އޮޑިޓް ރިޕޯޓްތައް އަޅުގަނޑުމެން ހިއްސާ ކުރަން ޖެހޭ ފަރާތްތަކާ ހިއްސާކުރަމުން އެބަ ގެންދަން. މި ހިއްސާ ކުރުމުގައި އަޅުގަނޑުމެންގެ އަބުރު ކަތިލިޔަސް ރައްޔިތުންގެ ހައްގުގައި މިކަންކަން ހާމަކޮށް ދޭނަން."
އޭނަ ވިދާޅުވި ގޮތުގައި ކުރީގެ ސަރުކާރުން ހިންގި "ބިންވެރިޔާ" ސްކީމްގެ ދަށުން ހުޅުމާލެއިން 50 ވަރަކަށް ބިން ވެސް ނުހައްގުން އެކި ފަރާތްތަކަށް ދޫކޮށްފައި އެބަހުރި ކަމަށެވެ. އަދި އެއީ ކޮން ބައެއްކަން ހާމަކުރައްވާނެ ކަމަށް ވެސް ވިދާޅުވެފައިވެ އެވެ. ވިދާޅުވީ ނުހައްގުން ބިން ދޫކުރީ ކޮން ބައެއްތޯ ބަލައި، އެ މީހުންގެ މައުލޫމާތު އާންމު ކުރައްވާނެ ކަމުގައެވެ.
އަދި ތިލަފުށިން ވެސް 35 ބިމެއް ހައްގު ނޫން ފަރާތްތަކަށް ދީފައިވާ ކަމަށް ވިދާޅުވި އެވެ.