ރައްޔިތުންގެ މަޖިލީހުގެ އިންތިހާބު އަންނަ މަހަށް ފަސްކުރުމާ ގުޅިގެން ރީރަޖިސްޓްރޭޝަނަށް ހުޅުވައިލަން އޮތް ދުވަސް އިލެކްޝަން ކޮމިޝަން (އީސީ) އިން އަވަސްކޮށްފި އެވެ.
ކުރިން މި މަހުގެ 17 ގައި ބާއްވަން ނިންމި އިންތިހާބު އަންނަ މަހުގެ 21 އަށް ފަސްކުރުމާ ގުޅިގެން ރީރަޖިސްޓްރޭޝަނަށް އަލުން ހުޅުވައިލަން ނިންމީ މި މަހުގެ 14 ގަ އެވެ. އަދި އެކަމަށް ދޭން ނިންމި ތިން ދުވަހުގެ މުހުލަތު ހަމަވާނީ 17 އަށެވެ. ނަމަވެސް އީސީން މިހާރު ވަނީ ރީރަޖިސްޓްރޭޝަން މި މަހުގެ 10 އަށް އަވަސްކޮށްފަ އެވެ. އަދި ސުންގަޑި ހަމަވާނީ މި މަހުގެ 16 އަށެވެ.
އިންތިހާބު ފަސްކުރުމާ ގުޅިގެން ވޯޓްލެވޭ މީހުންގެ އަދަދު ވެސް އިތުރުވެ އެވެ. އެގޮތުން ވޯޓާސް ލިސްޓަށް އަލަށް އިތުރުވި 560 މީހުންނާ އެކީ ވޯޓްލުމުގެ ހައްގު 284،887 މީހުންނަށް ލިބެ އެވެ. އެ ލިސްޓަށް އަލަށް އިތުރުވި މީހުންނަށް އޮތީ މިއަދު މެންދުރު ފަހު 3:00 އާ ހަމަައަށް ޝަކުވާ ހުށަހެޅުމުގެ ފުރުސަތު ދީފަ އެވެ.
ވިހި ވަނަ މަޖިލިސް އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ.