ރާއްޖެ އިން ރޯމަސް ބޭރުކުރުން ހުއްޓާލަނީ

ރާއްޖެ އިން ރޯމަސް ބޭރު ކުރުން ހުއްޓާލަން އަމާޒު ހިފާފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒުގެ "ހަފުތާ 14" ގެ ތެރޭގައި މަސްވެރިކަމުގެ ދާއިރާ އިން ހާސިލުކުރެވުނު ކަންކަމާ ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ މި ސަރުކާރުގެ އެންމެ ބޮޑު އަމާޒަކީ ރޯމަސް ބޭރުން ކުރުން ހުއްޓާލައި، މައިގަނޑު ގޮތެއްގައި ޕްރޮސެސްކުރި މަސް ރާއްޖެ އިން ބޭރުކުރުން ކަމަށެވެ.

"އެންމެ ބޮޑު އަމާޒަކީ ވެލިޔުއެޑްކޮށްގެން މަސް ބޭރުކުރުން. މިހާރު ރާއްޖޭގެ ކެޗް މި ހުރީ އަހަރެއްގެ މައްޗަށް 120،000 ޓަނުގައި ހުރި އިރު ރާއްޖެ އިން ބޭރު މި ކުރެވެނީ ގާތްގަނޑަކަށް 62، 65 ޓަނުގެ މަސް. އޭގެ 75 އިންސައްތަ އަކީ ރޯ މެޓީރިއަލްގެ ގޮތުގައި ބޭރު ކުރެވޭ މަސް." ޝިޔާމު ވިދާޅުވި އެވެ. "އެހެންވެ އަޅުގަނޑުމެންގެ އަމާޒަކަށް ވެފައި މި ވަނީ ރޯ މެޓީރިއަލް ޒީރޯ ކުރުން. އެއީ ހަމަ ދަޅުގައި ބަންދު ކޮށްގެން ނޫނީ އެހެން ޕްރޮސެސިން މެތޯޑްތަކުގައި ވެލިއެޑްކޮށްގެން މަސް ބޭރު ކުރުމަކީ އަޅުގަނޑުމެންގެ އަމާޒު."

ރާއްޖެ އިން ރޯމަސް ބޭރުކުރުން މަދުކޮށް، މަހުން އުފައްދާ ބާވަތްތައް އިތުރުކޮށްގެން މަސްވެރިކަމުގެ ދާއިރާގެ އާމްދަނީ އިތުރު ކުރުމުގެ ވާހަކަ އަކީ ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ދެކެވިފައި އޮތް ވާހަކައެކެވެ. އެގޮތުން ކުރީގެ ސަރުކާރުގައި ރާއްޖެއިން ބޭރު ކުރާ ރޯމަހުގެ އަދަދު މަދުކުރުމަށް ފެލިވަރުގެ ޕްރޮސެސިން ކެޕޭސިޓީ އިތުރުކުރުމާއި ފެލިވަރު، ކޫއްޑޫ، ކަނޑުއޮތްގިރި، އަދި ތިނަދޫ އާއި މުލަކުގައި، ގާއިމުކުރެވޭ ކޯލްޑްސްޓޯރޭޖް ބޮޑުކުރުމުގެ މަސައްކަތްތަކެއް ވެސް ފެށި އެވެ.