އިގުތިސާދީ ބޮޑެތި މަސައްކަތްތަަކަށް އައްޑޫގެ ހަތަރު އަވަށަކުން ދޫކުރަން ނިންމި ބިންތަކަށް 25 ފަރާތަކުން ޕްރޮޕޯސަލް ހުށަހަޅައިފި އެވެ.
ހުޅުދު އާއި މީދޫގެ އިތުރުން ފޭދު އާއި މަރަދޫފޭދޫން ދޫކުރަން ނިންމު 13 ބިމަށް ކުރިމަތިލުމުގެ ފުރުސަތު ހަމަވީ މިއަަދެވެ.
އިގުތިސާދީ ބޮޑެތި މަސައްކަތްތަކަށް އެ ހަތަރު އަވަށުބް ދޫކުރަނީ 5،000 އާއި 10،000 އަކަފޫޓްގެ ބިން ކަމަށެވެ.
އައްޑޫ ޑެޕިއުޓީ މޭޔަރު އަބްދުﷲ ތޮއްޔިބް (ޓޮމް) މިއަދު ވިދާޅުވީ ކައުންސިލުން ވަރަށް ކުރު މުއްދަތެއް ދީގެން، ޝައުގުވެރިވާ ފަރާތްތަކެއް ހޯދަން އިއުލާން ކުރުމުން މިކަމަށް ވަރަށް ބޮޑު ތަރުހީބެއް ލިބިފައިވާ ކަަމަށެވެ.
އޭނާ ވިދާޅުވީ އެކަމުން ދައްކުވައި ދެނީ އިގުސާދީ ބޮޑެތި މަސައްކަތްތައް އައްޑޫގައި ކުރަން ގިނަ ބަޔަކު ޝައުގުވެރިކަން ހުރުން ކަމަަށެވެ.
ކައުންސިލުން ބުނީ މިއަދު ލިބުނު ޕްރޮޕޯސަލްތައް ދެ ހަފުތާއެއް ދުވަހުގެ ތެރޭގައި އިވެލުއޭޓްކޮށް، ކުރިމަތިލި ފަރާތްތަކާ އެކު ސޮއި ކުރާނެ ކަމަށެވެ.
"އަޅުގަނޑުމެން ބޭނުން ވަނީ ވަރަށް އަވަހަށް އެ ބިންތަކުގައި މަސައްކަތްތައް ފެށިގެން ދިއުމަށް. އެހެންވީމާ އިދާރީ ގޮތުން ވެސް އަޅުގަނޑުމެން މިކަމުގައި ނިންމަން ޖެހޭ ކަންކަން ވަރަށް ބާރަށް ކުރިއަށް ގެންދާނަން،" ޓޮމް ވިދާޅުވި އެވެ.