ކުރިއަށް އޮތް ރޯދަ މަހަށް ހާއްސަކޮށްގެން ހުޅުމާލޭގެ ފޭސް ދޭއްގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއްޔެ ވަގުތީ މިސްކިތެއް ހުޅުވައިފި އެވެ.
އެ މިސްކިތުގެ ނަމަކީ "މަސްޖިދުލް ޝާކިރީން" ކަމަށެވެ. މި މިސްކިތް ހުންނަނީ ފޭސް ދޭއްގެ ހިޔާ ޕާކް ސަރަހައްދުގަ އެވެ. އެޗްޑީސީން ބުނީ މި މިސްކިތަކީ ހިޔާ ސަރަހައްދުގައި ދިރިއުޅޭ އިސްރަށްވެހިންނާއި ހާއްސަ އެހީ އަށް ބޭނުންވާ މީހުންނަށް މިސްކިތަށް ދިއުމަށް ދުރު ސަރަހައްދަކަށް ދާންޖެހޭތީ ދިމާވާ ދަތިތަކަށް ހައްލެއް ގެނައުމުގެ ބޭނުމުގައި ހުޅުވި މިސްކިތެއް ކަމަށެވެ.
"މަސްޖިދުލް ޝާކިރީން" އަކީ އެއްފަހަރާ 100 މީހުންނަށް ނަމާދުކުރެވޭ ހަދާފައިވާ މިސްކިތެކެވެ. މިސްކިތުގައި އަންހެނުންނަށް ބޭފުޅުންނަށް ވެސް ނަމާދު ކުރެވޭނެ އެވެ.
ހުޅުމާލެ ފޭސް ދޭއްގައި މުނިހޯމް ކެއާ އިން ބިނާކުރި 1،500 މީހުންގެ ޖާގައިގެ ޒަމާނީ ރީތި މިސްކިތް މިއަދު ހުޅުވަން އިސްލާމިކް މިނިސްޓްރީން ވަނީ ނިންމައިފަ އެވެ. މިއީ ފޭސްގައި ހުޅުވާ ދާއިމީ ފުރަތަމަ މިސްކިތެވެ.