ކަސްޓަމްސްގެ ވެހިކަލަކަށް ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު ގެންނެވި ބަދަލަކާ ގުޅިގެން އާންމުންގެ ފާޑުކިޔުންތައް އަމާޒުވުމުން އެކަމަށް މައާފަށް އެދިވަޑައިގެން ވެހިކަލް ކުރިން އޮތް ގޮތަށް ބަދަލުކުރައްވާނެ ކަމަށް ވިދާޅުވެއްޖެ އެވެ.
ކަސްޓަމްސްގެ އެންފޯސްމަންޓް އެންޑް ބޯޑާ ޕްރޮޓެކްޝަން ޑިިޕާޓްމަންޓްގެ ބޭނުމެއް ރާއްޖެ ޖަޕާނުން ހަދިޔާކުރި ކާރެއްގައި މާނިއުގެ އަމިއްލަ ހަރަދުގައި ރަން ކުލައިން ބަދަލުތަކެއް ގެނައި ވާހަކަ އޭގެ ފޮޓޯއަކާ އެކީ އޭނަ ޕޯސްޓްކުރެއްވި އެވެ.
As the public is unhappy about the gold trim, I will remove it. No public finances were used for this. Everything was done with my personal finances. It will be reverted back to normal. I apologize. 🙏 https://t.co/SUn6o4ooE1
— Maaniu. 🇲🇻 (@yoosufmaaniu) March 7, 2024
އެ ޕޯސްޓްގައި މާނިއު ވިދާޅުވީ ކާރަށް ބަދަލުތަކެއް ގެނައީ ކަސްޓަމްސްގެ އާ ލޯގޯ ރަން ކުލައިގައި ހުންނާނެތީ އެއްގޮތް ކުރުމަށް ކަމަށާއި އެ ބަދަލު ކަސްޓަމްސްގެ ހުރިހާ ވެހިކަލަކަށް ވެސް ގެންނަން ނިންމި ކަމަށެވެ.
ނަމަވެސް ފޮޓޯ އާންމުކުރުމާ އެކީ އެކަމަށް މައާފަށް އެދިވަޑައިގެން ކާރު ކުރިން އޮތް ގޮތަށް ބަދަލު ކުރައްވާނެ ކަމަށް ވިދާޅުވި އެވެ. މާނިއު ވިދާޅުވީ ކާރަށް ބަދަލުތަކެއް ގެނައީ ސީދާ އޭނަގެ އަމިއްލަ ހަރަދުގަ އެވެ. އަދި އެކަމަށް ދައުލަތުގެ ފައިސާއެއް ބޭނުން ނުކުރައްވާ ކަމަށް ވިދާޅުވި އެވެ.
ކުރިން ނެޝަނަލް އިންޓަގްރިޓީ ކޮމިޝަންގެ ރައީސްގެ މަގާމު ވެސް އަދާކުރެއްވި މާނިއު ކަސްޓަމްސްގެ ވެރިއަކަށް މި ސަރުކާރުން އައްޔަންކުރީ ނޮވެމްބަރު މަހުގެ 20 ގަ އެވެ.