ރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި ސަރުކާރުން ގަތް ޑްރޯންތަކެއް ރާއްޖެ ގެނެސްފި އެވެ.
އެނގިފައިވާ ގޮތުގައި ތުރުކީގެ ކުންފުންޏަކާ އެކީ ވި އެއްބަސްވުމުގެ ދަށުން ގެބައި ޑްރޯންތައް މިހާރު ހުރީ ނ. މާފަރު އިންޓަނޭޝަނަލް އެއާޕޯޓުގަ އެވެ. ނަމަވެސް މި އެއްޗިއްސާ ބެހޭ އެއްވެސް މައުލޫމާތެއް ސަރުކާރުން މިހާތަނަށް އަދި ހާމަކޮށްފައެއް ނުވެ އެވެ.
އެނގިފައިވާ ގޮތުގައި ޑްރޯންތައް ރާއްޖެ ގެނައީ މި މަހުގެ 3 ގަ އެވެ.
މީގެ ހަފުތާއެއްހާ ދުވަސް ކުރިން ރައީސް ޑރ. މުހައްމަދު މުއިއްޒު ވިދާޅުވެފައި ވަނީ ރާއްޖޭގެ ކަނޑު ސަރަހައްދު ބެލެހެއްޓުމުގެ މަސައްކަތް މި މަހުގެ ތެރޭގައި ސަރުކާރުން ފަށާނެ ކަމަށެވެ. އަދި މިއީ 24 ގަޑިއިރު ކުރިއަށްދާނެ މަސައްކަތެއް ކަމަށާއި މީގެ ސަބަބުން ރާއްޖޭގެ ކަނޑުގެ ސަރަހައްދުގެ ސަލާމަތާއި ރައްކާތެރިކަން ވަރަށް ބޮޑަށް ކަށަވަރު ކުރެވިގެން ދާނެ ކަމަށް ވިދާޅުވި އެވެ.
މައުލޫމާތު ލިބިފައިވާ ގޮތުގައި ކަނޑުގެ ސަރަހައްދު ބަލަހައްޓަން ބޭނުންވާ ޑްރޯން ހޯދުމަށް ސަރުކާރުން 560 މިލިއަން ރުފިޔާގެ އެއްބަސްވުމެއް ތުރުކީގެ ކުންފުންޏާ އެކު ހަދާފައިވެ އެވެ.