ސަރުކާރުން އެކުލަވައިލަން ނިންމި މަސްވެރިންގެ ދަފުތަރުގެ މަސައްކަތް މި އަހަރުގެ ޖުލައި މަހަށް ނިމޭނެ ކަމަށް ފިޝަރީޒް މިނިސްޓަރު އަހުމަދު ޝިޔާމު ވިދާޅުވެއްޖެ އެވެ.
މަސްވެރިންގެ ދަފުތަރުގައި ރަޖިސްޓްރީވާން ހުޅުވައިލީ މިދިޔަ މަހުގެ 16 ގަ އެވެ.
މިނިސްޓަރު ވިދާޅުވީ ދަފުތަރު އެކަލަވައިލުމަށްޓަކައި މިނިސްޓްރީގެ ޓީމުތަކެއް ގއ، ގދ. އައްޑޫޓީ، ފުވައްމުލައް، ލ، ށ، އދ އަދި ހދ. އަތޮޅުގައި ހަރަކާތްތެރިވަމުން އަންނަ ކަމަށެވެ. އަދި އެ އަތޮޅުތަކުގައި މަސައްކަތް ނިމުން ޓީމުތައް ދެން ހަރަކާތްތެރި ވާނީ ހއ، ޅ، ތ، އަދި މާލެ ސަރަހައްދުގަ އެވެ.
ޝިޔާމު ވިދާޅުވި ގޮތުގައި ޖުލައި މަހުގެ ތެރޭގައި މަސްވެރިންގެ ދަފުތަރު ފުރިހަމަ ކުރެވޭނެ އެވެ. ދަފުތަރު އެކުލަވައިލުމުގެ މަސައްކަތުގެ ތެރެއިން ފާނައިގެ މަސްވެރިކަމާއި ފަރުމަހުގެ މަސްވެރިކަމާއި ރިކްރިއޭޝަނަލް ފިޝިން އަދި ސްޕޯޓްސް ފިޝިންގ ފަދަ ކަންކަމުގައި ހަރަކާތްރެރިވާ މީސްމީހުންގެ މަޢުލޫމާތު ވެސް އެއްކުރާނެ އެވެ.
މަސްވެރިންގެ ދަފުތަރެއް އެކުލަވައިލުމުގެ ބޭނުމަކީ މަސްވެރިން ބޭންކިން ނިޒާމުގެ ތެރެއަށް ވެއްދުމަށާއި، ތަފާތު އެކިއެކި ބޭނުންތަކަށް މަސްވެރިންނަށް އަމާޒުކޮށް ލޯނު ދޫކުރުމަށާއި މަސްވެރިންނަށް ދަޢުލަތުން ފޯރުކޮށް ދިނުމަށް ބޭނުންވާ އިޖުތިމާޢީ ރައްކާތެރިކަމާއި ސަބްސިޑީ ފަދަ ވަސީލަތްތައް ސީދާ މަސްވެރިންނަށް ފޯރުކޮށް ދެވޭނެ އިންތިޒާމެއް ހަމަޖެއްސުމަށް މަގުފަހި ކުރުމެވެ.