ކުރިއަށް އޮތް ރޯދަ މަހު އަސާސީ ކާބޯތަކެތި އަގުބޮޑުވިޔަ ނުދިނުމަށް މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު އެގޮތަށް ވިދާޅުވީ އާންމުން ކުރާ ސުވާތަކަށް ޖަވާބު ދެއްވަން ކުރިއަށް ގެންދަވާ "ރައީސް ޖަވާބު" ގަ އެވެ. އެގޮތުން މީހަކު ކުރި ސުވާލެއްގެ ޖަވާބުގައި ރައީސް ވިދާޅުވީ އަސާސީ ކާބޯތަކެތި އަގުބޮޑުވިޔަ ނުދިނުމަށް އެސްޓީއޯ މެދުވެރިކޮށް މިހާރު ވެސް މަސައްކަތްތައް ކުރަމުން އަންނަ ކަމަށެވެ. އަދި ކުރިއަށް އޮތް ތަނުގައި ވެސް ކާބޯތަކެތި އަގުހެޔޮކުރުމަށްޓަކައި އިތުރު މަސައްކަތް ކުރައްވާނެ ވިދާޅުވި އެވެ.
"ރޯދަމަސް ފެށިގެންދާ އިރު އެންމެ އަސާސީ ހުރިހާ ބާވަތެއް އެސްޓީއޯ މެދުވެރިކޮށް ގެނެވި، އަގުހެޔޮކުރުމުގެ މަސައްކަތް މިހާރު ކުރެވެމުން އެބަދޭ. މިހާ ރުވެސް އަގުހެޔޮކޮށް ވިއްކަން ފަށާފަ ވަނީ،" ރައީސް ވިދާޅުވި އެވެ. "އަދިވެސް އިތުރު މަސައްކަތްތައް ކުރާނަން ކާބޯތަކެތީގެ އަގުހެޔޮކުރުމަށްޓަކައި."
ރައީސް ވިދާޅުވި ގޮތުގައި، ރާއްޖޭގައި އުފެއްދޭ ހުރިހާ ބާވަތްތަކެއްގެ ކާބޯތަކެތި ރާއްޖޭގެ އުފެއްދޭނެ ނިޒާމެއް ގާއިމްކޮށް ފުޑް ސެކިއުރިޓީ ޔަގީން ކުރުމެވެ. ރައީސް ވިދާޅުވީ ކާބޯތަކެތީގެ އަގުހެޔޮ ކުރުމަކީ ސަރުކާރުގެ ވަރަށް ބޮޑު އިސްކަމެއް ވެސް ދޭ ކަމެއް ކަމަށެވެ.
"ކުރިއަށް އޮތް މުސްތަގުބަލުގައި މެދުރާސްތާއާއި ދުރުރާސްތާ އަށް ސަރުކާރުގެ ޕްލޭނަކީ ރާއްޖޭގައި އުފެއްދޭ ހުރިހާ ބާވަތްތަކެއްގެ ކާބޯތަކެތި ރާއްޖޭގެ އުފެއްދޭ ގޮތް ގާއިމްކޮށް، ފުޑް ސެކިއުރިޓީ ޔަގީންކުރަން،" ރައީސް ވިދާޅުވި އެެވެ. "އޭރުން ކާބޯތަކެތީގެ އަގުވެސް ދަށްވެގެން ދާނެ އަދި ކުއަންޓިޓީވެސް ޔަގީންވެގެން ދާނެ."
ރޯދަ މަހު އެންމެ ޑިމާންޑް ބޮޑުވާ ބާވްތަތަކުގެ ތެރޭގައި ފިޔަ އާއި އަލުއްވާއި ބިސް ހިމެނެ އެވެ. އެސްޓީއޯ އިން ވަނީ ރޯދަ އަށް ގެނައި ފިޔާ ޝިޕްމަންޓުން މިހާރު ކުރިން 20ރ. އަށް ވިއްކަމުން ފިޔާ ކިލޯއެއްގެ 17ރ. އަށް ކުޑަކޮށްފަ އެވެ. އަދި އެ ކުންފުނިން މިހާރު އަންނަނީ އަގުހެޔޮކޮށް ލުނބޯ ވެސް ވިއްކަމުންނެވެ.