އިގުތިސާދީ ބޮޑެތި މަސައްކަތްތަކަށް ހުޅުވާލި ފުރުސަތުގައި، ލިބުނު ޕްރޮޕޯސަލްތައް އިވެލުއޭޓް ކުރަން ކަނޑައަޅާފައިވާ އިވެލުއޭޝަން ކޮމިޓީ މަސައްކަތް ކުރާނީ ވަރަށް މިނިވަންކޮށް ކަމަށާއި ވަކި މީހެއްގެ އެއްވެސް ނުފޫޒެއް އެ ކޮމިޓީ އަށް ނުފޯރާނެ ކަަމަށް އައްޑޫ ޑެޕިއުޓީ މޭޔަރު އަބްދުﷲ ތޮއްޔިބް (ޓޮމް) ވިދާޅުވެއްޖެ އެވެ.
އެ މަޝްރޫއަށް ކުރިމަތިލި ބައެއް ފަރާތްތަކުން ވަނީ ޓޮމް އިވެލުއޭޝަން ކޮމިޓީގައި ހިމެނިވަޑައިގަންނަވާތީ ކަންބޮޑުވުން ފާޅުކޮށްފަ އެވެ.
އެ ފަރާތްތަކުނެ ބުނެފައި ވަނީ ޓޮމަކީ މިހާރު ވެސް އަމިއްލަ ގޮތުން ޓޫރިޒަމާ ގުޅުން ހުރި މަސައްކަތްތަކެއް ކުރައްވާ ބޭފުޅަކަށްވާތީ އޭނާ އިވެލުއޭޝަން ކޮމިޓީގައި އިންނެވުމަލީ "މަސްލަހަތު" ފުށުއަރާނެ ކަމެއް ކަމަށެވެ.
އެކަމަކު ޓޮމް ވިދާޅުވީ އެކަން އެގޮތަށް ނުދާނެ ކަމަަަށެވެ. އަދި އެކަން އެގޮތަށް ދާކަށް އެއްވެސް ފުރުސަތެއް ވެސް ނޯންނާނެ ކަމަށް އޭނާ ވިދާޅުވި އެވެ.
"އަޅުގަނޑުގެ އެއްވެސް ގާތް މީހަކު ނުވަތަ އަޅުގަނޑާ އެއްވެސް ގޮތަކަށް އަދި އަޅުގަނޑުގެ ހިއްސާއެއް އޮތް އެއްވެސް ކުންފުންޏަކުން މިކަމަކަށް ކުރިމައްޗެއް ނުލާ. އެ ޔަގީންކަން އަޅުގަނޑަށް އެބަ އޮތް. އެހެންވީމާ ކޮންފްލިކްޓް އޮފް އިންޓްރަސްޓް ކުރިމަތިވުމުގެ އެއްވެސް ފުރުސަތެއް ނޯންނާނެ،" އޭނާ ވިދާޅުވި އެވެ.
ޓޮމް ވިދާޅުވީ އޭނާ އަބަދުވެސް މަސައްކަތް ކުރައްވަނީ އައްޑޫގެ ވީހާ ވެސް ގިނަ ބަޔަކު އިގުތިސާދީ މަސައްކަތުގެ ތެރެއަށް ވައްދައި، އެކަމަށް ހިތްވަރު ދިނުން ކަމަށެވެ.
"އެ ނޫން އެއްވެސް އިންޓަންޝަނެއް އަޅުގަނޑުގެ ނެތް. އަޅުގަނޑަކީ މަސައްކަތުގެ ތެރެއަށް މީހުން ނެރެން އަބަދު ވެސް މަސައްކަތް ކުރާ މީހެއް. ވަކި ބަޔަކަށް ފައިދާ ހޯދައި ދޭކަށް އަޅުގަނޑު މަސައްކަތެއް ނުކުރާނަން. އަޅުގަނޑު ހުރިހާ ފަރާތްތަކަށް ވެސް ވަރަށް ބޮޑު ޔަގީންކަމެއް ދެން އިވެލުއޭޝަން ކޮމިޓީ މަސައްކަތް ކުރާނީ ވަރަށް މިނިވަންކޮށްކަން،" އޭނާ ވިދާޅުވި އެވެ. "ކޮމިޓީއެއް ވަކި ނުފޫޒެއް ނުފޯރާނެ. ޓްރާންސްޕޭރަންޓްކޮށް އިވެލުއޭޝަން ކުރިއަށް ގެންދާނީ."