ސަރުކާރުގެ އެންމެ ބޮޑު ހޮސްޕިޓަލް ކަމަށްވާ މާލޭގެ އައިޖީއެމްއެޗްގައި ކުރިން ހުރި މިސްކިތް ބަންދުކޮށްފައި ހުންނަތާ ފަސް އަހަރު ފަހުން އެތަން މަރާމާތުކޮށް އަލުން މިއަދު ހުޅުވައިފި އެވެ.
މިސްކިތް ހުޅުއްވާދެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދާއި ހެލްތު މިނިސްޓަރު ޑރ. ޢަބްދުﷲ ޙަލީލެވެ.
ޝަހީމްވިދާޅުވީ ހޮސްޕިޓަލެއްގައި މިސްކިތެއް ހުރުމަކީ ހޮސްޕިޓަލުން ޚިދުމަތް ހޯދާ މީހުންނާއި ބަލި މީހުންގެ އެހީތެރިންނަށް ލިބޭނެ ބޮޑު ހިތްހަމަޖެހުމަކަށް ވާނެ ކަމަށާއި ހޮސްޕިޓަލުގައި ތިބެ މިސްކިތެއްގައި ނަމާދުކުރެވޭ ގޮތް ވުމަކީ ބަލި މީހުންނަށާއި އެހީތެރިންނަށް މަޢުނަވީ ގޮތުންނާއި ރޫޙާނީ ގޮތުން ބޮޑު ހިތްހަމަޖެހުމަކާއި ބަލިން ރަނގަޅުވުމުގެ އުންމީދު ލިބޭނެ ކަމެއް ކަމަށެވެ.
މިނިސްޓަރު ވަނީ ގިނަ ބަޔަކު ޚިދުމަތް ހޯދާ ހޮސްޕިޓަލްގައި މިސްކިތް ހުޅުވުމަށް އިސްނަގައިގެން އަމިއްލައަށް މަސައްކަތްކުރުމުން އައިޖީއެމްއެޗްގެ މެނޭޖްމަންޓަށާއި މިސްކިތް ހެދުމަށް މާލީ ގޮތުންނާއި ޢަމަލީ ގޮތުން އެހީތެރިކަން
ފޯރުކޮށް ދިން ހުރިހާ ފަރާތްތަކަށް ޝުކުރު ވެސް އަދާކުރައްވައިފަ އެވެ.
އައިޖީއެމްއެޗްގެ ސީއީއޯ އިބްރާހިމް ޢަބްދުއްރައްޒާޤް ހަލީމް ވިދާޅުވީ މިސްކިތް ބަންދުކުރީ 2019 ގެ ރޯދައިގެ ފަހުން ކަމަށެވެ. އަދި އަލުން މިސްކިތް އަލުން ހުޅުވަން ނިންމީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކަމަށް ވިދާޅުވި އެވެ. އެގޮތުން އައިޖީއެމްއެޗް ފަދަ ގިނަ ބަޔަކު ޒިޔާރަތްކޮށް ޚިދުމަތް ހޯދާ ހޮސްޕިޓަލެއްގައި އެކަށޭނަ ނަމާދުކުރެވޭނެ ނިޒާމެއް ޤާއިމްކޮށްދިނުމަށް ރައީސުލްޖުމްހޫރިއްޔާ އެދިވަޑައިގެންނެވި ކަމަށް އިބްރާހިމް ޢަބްދުއްރައްޒާޤް ޙަލީމް ވިދާޅުވިއެވެ.
"މިސްކިތް ބަންދުކުރި ފަހުން މިތަން ބޭނުންކުރަމުން ދިޔައީ ޖަންކް ޔާޑެއްގެ ގޮތުގައި. އެހެންވެ އަޅުގަނޑުމެން ނިންމީ މިތަން ރޯދަމަސް އައުމުގެ ކުރިން ނަމާދު ކުރެވޭނެ މިސްކިތެއް މިތަނުގައި ޤާއިމްކުރަން." ޙަލީމް ވިދާޅުވި އެވެ.
އައިޖީއެމްއެޗް މިސްކިތުގައި އެއްފަހަރާ 100 އަށްވުރެ ގިނަ މީހުންނަށް ނަމާދު ކުރެވޭނެ އެވެ.