ކްރިމިނަލް ކޯޓުގައި ކުރިޔަށްދާ ޝަރީޢަތުގެ އަޑުއެހުންތަކާއި، ބަންދާމެދު ގޮތެއް ނިންމުމަށް ބާއްވާ އަޑުއެހުންތައް އަލުން އޮންލައިންކޮށް ބާއްވަން ނިންމައިފިއެވެ.
އެ ކޯޓުން އިއްޔެ ބުނީ އެ ކޯޓުގެ ސާވާ ރައްކާތެރި މާހައުލަކަށް މިހާރު ބަދަލުކޮށްފައިވާތީ، މިއަދުން ފެށިގެން އަޑުއެހުންތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިއުމަށް ކޯޓުގެ ޣާޒީންގެ މަޖިލީހުން ނިންމާފައިވާ ކަމަށެވެ. ޝަރީޢަތްތައް އަޑުއެހުމުގެ ގޮތުންނާއި ޝަރީޢަތް އަޑުއެހުމަށް ބޭނުންވާ ނޫސްވެރިންނަށް ވެސް އޮންލައިންކޮށް ބައިވެރިވެވޭނެ އިންތިޒާމު ހަމަޖެހޭނެ ކަމަށް ކްރިމިނަލް ކޯޓުން ބުންޏެވެ.
އިމާރާތް ބާވުމުގެ ސަބަބުން ވިއްސާރަ ދުވަސްވަރު ކޯޓްގެ ތެރެއަށް ފެން ލީކްވާތީ، ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިއަށް ގެންދިއުން ހުއްޓައިލަން ނިންމިކަން ކްރިމިނަލް ކޯޓުން އިޢުލާނުކުރީ މި އަހަރުގެ ޖެނުއަރީ 11 ގަ އެވެ. އޭރު ކޯޓުން ބުނީ، ވިއްސާރައިގެ އަސަރު ކޯޓުގެ ކަރަންޓު ވިއުގައަށް ކުރަމުން އަންނަ ކަމަށާއި ސާވާތަކަށް ފެނުގެ އަސަރުކޮށް، އެކި ވަގުތުތަކުގައި، ނެޓްވޯކް ކެނޑެމުންދާ ކަމަށެވެ. އެހެންވެ ސާވާތައް ރައްކާތެރިކުރުމުގެ ގޮތުން އެހެން އިމާރާތަކަށް ބަދަލުކުރާތީ ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ގެންދެވޭނެ ގޮތެއް އޭރު ނެތް ކަމަށް ބުންޏެވެ.