މާދަމާ އިން ފެށިގެން އައްޑޫގައި ފިތުރު ޒަކާތް ބަލައިިގަންނަން ފަށާނެ ކަމަށް ކައުންސިލުން ބުނެފި އެވެ.
ފިތުރު ޒަކާތް ދައްކާނީ ކޮންމެ އަވަށެއްގައި ވެސް އަވަށު އޮފީހަށެވެ. އައްޑޫ ކައުންސިލުން ބުނީ ފިތުރު ޒަކާތް ބަލައިގަންނަން ހަމަޖެހިފައި ވަނީ މާދަމާ އިން ފެށިގެން ރޯދަ މަހުގެ 28 ވަނަ ދުވަހާ ހަމައަށެވެ.
ކައުންސިލްގެ އެކައުންޓް ނަމްބަރަށް ފައިސާ ޓްރާންސާފާކޮށްގެން ވެސް ފިތުރު ޒަކާތް ދެއްކޭނެ އެވެ.
މިގޮތަށް ފައިސާ ފިތުރު ޒަކާތް ފަރާތްތަކުން ފައިސާ ދެއްކުމަށް ފަހު އެ އަވަށެއްގެ އަވަށު އޮފީހުގެ ވައިބަ ނަންބަރަށް ސްލިޕް ފޮނުވުމުން ރަސީދު ލިބޭނެ އެވެ. ރަސްމީ ގަޑީގެ ފަހުން ފައިސާ ޖަމާކުރުމަށް ފަހު ސްލިޕް ފޮނުވާ ފަރާތްތަކަށް ރަސީދު ލިބޭނީ ޖެހިގެން އަންނަ ރަސްމީ ދުވަހުގެ ރަސްމީ ގަޑީގަ އެވެ.
ފިތުރު ރޯދަ ޒަކާތަކީ ރޯދަ މަސް ނިމުމުގެ ކުރިން ދައްކަން ޖެހޭ އެއްޗެކެވެ. ފިޠުރު ޒަކާތް ނެރޭނީ އެ ބަޔަކު އަހަރުގެ ތެރޭގައި ޢާންމުކޮށް ކައި އުޅުނު ބާވަތްތަކުން (ގޮވާމުން) 2.4 ކިލޯއެވެ. ނުވަތަ 2.4 ކިލޯގެ އަގެވެ. ފިތުރު ޒަކާތް ފިތުރު އީދު ދުވަހުގެ ކުރިން ބަހައި ނިންމަން ޖެހެ އެވެ. ފިތުރު ޒަކާތް ބަހަނީ ފަގީރުންނާއި މިސްކީނުންގެ ދަފުތަރުގައި ރަޖިސްޓްރީވާ ފަރާތްތަކަށެވެ.