ރަށުބަންދުގައި ހުންނަވައިގެން ސިޔާސީ ހަރަކާތްތަކުގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވާތީ ކަރެކްޝަންސް އިން ތަކުރާރުކޮށް އިންޒާރު ދީފައި ވަނިކޮށް އެ މަނިކުފާނު ކެމްޕޭނަށް ނުކުންނެވި މައްސަލަ ބަލަން ނިންމައިފި އެވެ.
އިއްޔެ ރޭ ހުޅުމާލޭފައި ބޭއްވި ކެމްޕޭން ހަރަކާތަކަށް ޔާމީން ވަޑައިގެންނެވި އެވެ. އެގޮތުން ހުޅުމާލޭގެ ފޭސް ދޭއްގެ ހިޔާ ފްލެޓް ސަރަހައްދުގައި އޮތް ކެމްޕެއިން ހަރަކާތެއްގައި ބައިވެރިވެވަޑައިގަތެވެ. އެއީ ޔާމީންގެ ތާއީދާ އެކު ހުޅުމާލެ އުތުރު ދާއިރާއަށް ވާދަކުރާ ކެންޑިޑޭޓް ކުރީގެ ފިލްމީ ތަރި އަހްމަދު ލަތީފްގެ ޖަގަހަ ހުޅުވުމުގެ ބައްދަލުވުމުކާ އެކު އެތަނުގައި ބޭއްވި މާހެފުމެއްގަ އެވެ.
މިއީ މަޖިލިސް އިންތިހާބުގެ ކެމްޕެއިން ހަރަކާތެއްގައި ޔާމީން މިގޮތަށް ބައިވެރިވެވަޑައިގެންނެވި ފުރަތަމަ ފަހަރެވެ.
Raees Yameen baiverive vadaigennevi Hulhumale Phase 2 fai oiy maahefumuge therein. #PowerToThePeople#ރައްޔަތުންގެބާރުޔަގީން pic.twitter.com/J4Te6sAqil
— PNFront (@PNFront_MV) March 10, 2024
ރަށުބަންދާ ހިލާފަށް ޔާމީން އަމަލުކުރައްވާފައިވާތީ އެކަން މިހާރު ބަލަމުން އަންނަ ކަރެކްޝަންސް އިން ބުންޏެވެ. އެކަމަކު އިތުރު ތަފުސީލެއް ނުދެ އެވެ.
މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބުކުރެއްވުމާ އެކީ ޔާމީން ޖަލުން ގޭބަންދަށް ބަދަލުކުރި އެވެ. އޭގެ ފަހުން ގޭބަންދު ރަށުބަންދަށް ލުއިކޮށް ދިނެވެ. މިއާ އެކީ ޔާމީން ތަކުރާރުކޮށް، އެ މަނިކުފާނު މިހާރު ރަޖިސްޓްރީކުރަން ހުށަހަޅާފައިވާ ޕާޓީ ޕީޕަލްސް ނެޝަނަލް ފްރޮންޓް (ޕީއެންއެފް) ގެ ޖަގަހަ ޖަލްސާތަކުގައި ބައިވެރިވެވަޑައިގަންނަވަމުން ގޮސްފައިވެ އެވެ.
ޔާމީން ތަންފީޒު ކުރައްވަމުން ގެންދަވާ ހުކުމަކީ ވ. އާރަށުގެ މުއާމަލާތުގައި ހިންގި ކޮރަޕްޝަނާއި މަނީލޯންޑްރިންގެ ކުށް ސާބިތުވެގެން އިއްވީ 11 އަހަރުގެ ހުކުމެކެވެ. އެ ހުކުމް އިއްވީ 2022 ގެ ޑިސެމްބަރު މަހުގެ ފަހުކޮޅު އެވެ.