ދަނޑުވެރިންނަށް މާލީ އެހީތެރިކަން ފޯރުކޮށް ދިނުމުގެ ގޮތުން، 15 މިލިއަން ރުފިޔާގެ ސްކީމެއް ކުރިއަށް ގެންދަން ނިންމައިފި އެވެ.
މިކަމުގެ އެއްބަސްވުމުގައި އެގްރިކަލްޗަ މިނިސްޓްރީ އާއި ފިނޭންސް މިނިސްޓްރީގެ އިތުރުން އެސްޑީއެފްސީން މިއަދު ވަނީ ސޮއި ވެސްކޮށްފަ އެވެ. މި އެއްބަސްވުމަކީ އެގްރިކަލްޗަ މިނިސްޓްރީ އާއި އިންޓަނޭޝަނަލް ފަންޑް ފޮ އެގްރިކަލްޗަރަލް ޑިވެލޮޕްމަންޓް އިފާޑް) ގުޅިގެން ހިންގަމުން އަންނަ "މޯލްޑިވްސް އެގްރިބިޒްނަސް ޕްރޮގްރާމް މެފް) ގެ ދަށުން ދަނޑުވެރިންނަށް މާލީ އެހީތެރިކަން ފޯރުކޮށްދިނުމުގެ ގޮތުން ވެވުނު އެއްބަސްވުމެކެވެ.
އެގޮތުން ދަނޑުވެރިންނަށް 15،188،700ރ. ގެ މެޗިން ގްރާންޓް ސްކީމެއް ކުރިއަށް ގެންދަން ވަނީ ނިންމައިފަ އެވެ.
އެއްބަސްވުމުގައި ފިނޭންސްގެ ފަރާތުން ސޮއިކުރެއްވީ، ސްޓޭޓު މިނިސްޓަރު ޙުސައިން ޝާމް އާދަމެވެ. އެގްރިކަލްޗަ މިނިސްޓްރީން ސޮއިކުރެއްވީ ސްޓޭޓު މިނިސްޓަރު މަރިޔަމް ވިޝާމާ އަޙްމަދެވެ. އެސްޑީއެފްސީން ސޮއިކުރެއްވީ މެނޭޖިން ޑިރެކްޓަރު އައިޝަތު ފިފްޝީން އަލީ އެވެ.
ވިޝާމާ ވިދާޅުވީ އެހީގެ ސްކީމް ހާއްސަކޮށްފައި ވަނީ މެޕްގެ ހަރަކާތްތައް ކުރިއަށް ގެންދާ ހއ، ހދ އަދި ށ އަތޮޅުގެ 26 ރަށުގެ ދަނޑުވެރިންނާއި ދަނޑުވެރިކަމުގައި ހަރަކާތްތެރިވާ ކުދި ވިޔަފާރިއާއި މެދު ފަންތީގެ ވިޔަފާރިވެރިންނަށް ކަމަށެވެ.
"ގްރީން ހައުސްތަކުގައި ހައިޑްރޮފޯނިކްސް ސިސްޓަމް ޤާއިމްކޮށްގެން ދަނޑުވެރިކަންކުރަން ބޭނުންވާ ދަނޑުވެރިންނަށް ޚާއްސަކޮށްގެން ކުރިއަށްގެންދާ މި ގްރާންޓަށް އެދި ހުށަހެޅުމަށް ފަހުގެ ތާރީޚެއްގައި އިއުލާން ކުރާނެ" އޭނަ ވިދާޅުވި އެވެ.