ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރުމާ ގުޅޭ ގޮތުން ރައީސް ޑރ. މުޙައްމަދު މުއިއްޒު ދެއްކެވި ވާހަކަތަކަށް ކުރީގެ ފިނޭންސް މިނިސްޓަރު އިބްރާހީމް ރައްދު ދެއްވައިފި އެވެ.
ރައީސް ވިދާޅުވީ ކައުންސިލްތަކުގެ އިދާރީ މުވައްޒަފުންގެ މުސާރައަށް ބަދަލެއް ގެނައުމުގެ ވިސްނުން ގެންގުޅުއްވާ އިރު، ގާނޫނުގެ ތެރެއިން ކައުންސިލްތައް ގިންތިކޮށްފައި ވަނީ ވަރަށް ދަށް ފަންތިއެއްގައި ކަމަށެވެ. އެހެންވެ އަދި ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރަން ސަރުކާރާއި ފިނޭންސް މިނިސްޓރީން މަސައްކަތް ކުރަމުން އަންނަ ކަމަށާއި ނަމަވެސް ކައުންސިލްތައް ގިންތިކޮށްފައި ހުންނަ ގޮތުން އެކަން ކުރުމަށް ދަތިވާ ކަަމަށް ވިދާޅުވި އެވެ.
ރައީސް ވިދާޅުވި ގޮތުގައި މިކަމަށް ހައްލެއް ގެނެވެން އޮތީ ރައްޔިތުންގެ މަޖިލީހުގެ ތެރެއިންނެވެ.
ރައީސްގެ މި ވާހަކަތަކާ ގުޅިގެން އަމީރު ވިދާޅުވީ ކައުންސިލްތަކުގެ އިދާރީ މުވައްޒަފުންނަކީ ސިވިލް ސާވިސް މުވައްޒަފުން ކަމަށާއި އެތަނުގެ މުސާރަ އާއި އިނާޔަތްތައް ކަނޑައަޅަނީ ނޭޝަނަލް ޕޭ ކޮމިޝަނުން ކަމަށެވެ. އަދި ޕޭ ކޮމިޝަނުން ވާނީ ޕޭ މެޓްރިކްސް އާއި ފްރޭމްވޯކް ހަދާފައި ކަމަށެވެ. އަދި އެއީ ރައްޔިތުންގެ މަޖިލީހުން ކުރަން ޖެހޭ ކަމެއް ނޫން ކަމަށް ވިދާޅުވި އެވެ.
އަމީރު ވިދާޅުވީ މި އަހަރުގެ ބަޖެޓް ފާސްކޮށްފައި އޮތީ ސިވިލް ސާވިސް މުވައްޒަފުންގެ މުސާރަ ވެސް ބޮޑުކުރާ ގޮތަށް ކަމަށެވެ. އަދި މުއައްސަސާތައް ގިންތިކޮށްފައިވާނީ، ޕޭ ކޮމިޝަނުން ކަމަށާއި އެއީ މަޤާމުގެ އެލަވަންސްތަކާއި ހާޒިރީ އިނާޔަތްތައް ކަނޑައެޅުމަށް އެކަނި ކަމަށް ވެސް ވިދާޅުވި އެވެ.