ދެ ދައުރު ފުރިހަމަކޮށްފައިވާ ނަމަ އިލެކްޝަންސް ކޮމިޝަން (އީސީ) ގެ މެމްބަރުންނަށް އިނާޔަތާ އެކު ރިޓަޔާވެވޭ ގޮތަށް އެ ކޮމިޝަންގެ ގަވައިދު އިސްލާހުކޮށްފި އެވެ.
އެ ކޮމިޝަނުން އެކުލަވާލި ގަވައިދުގައިވާ ގޮތުން ރިޓަޔާކުރުމުގެ ދަރަޖައާ އެކު، ވަޒީފާ އިން ވަކިކުރެވޭނީ، އުމުރުން 55 އަހަރު ފުރި، އީސީ އަށް މަދުވެގެން 15 އަހަރު ހިދުމަތްކޮށްފައިވާ ނަމަ އެވެ. އަދި ކޮމިޝަންގައި ވަޒީފާ އަދާކުރަމުން ދަނިކޮށް، އީސީގެ ކޮމިޝަނަރަކަށް އައްޔަންކޮށްފި ނަމަ، ރިޓަޔާކުރާ އިރު ހިދުމަތުގެ މުއްދަތު ބަލާނީ އެ އަހަރުތައް ވެސް ހިމަނައިގެން ކަމަށް ވެސް ގަވައިދުގައި ބުނެ އެވެ.
އެހެން ނަމަވެސް، ކޮމިޝަންގެ މެމްބަރަކު ރިޓަޔާވާ އިރު އުމުރުން 55 އަހަރުވާކަށް ލާޒިމެއް ނުވާނެ އެވެ. އެ ކޮމިޝަނަށް 10 އަހަރު ހިދުމަތް ކޮށްފައިވާ ނަމަ، މުޅި އުމުރަށް ލިބޭ އިނާޔަތްތަކާ އެކު ރިޓަޔާ ކުރެވޭނެ ކަމަށް ގަވާއިދުގައި ބުނެ އެވެ. އެ އުސޫލުގެ ދަށުން ރިޓަޔަކުރާ އިރު، އެއްފަހަރާ ގަނޑުކޮށް ދޭ ފައިސާ އިނާޔަތެއްގެ ގޮތުގައި އެ މީހަކު ހުރި ރޭންކަށް ކަނޑައަޅާފައިވާ މުސާރަ އާއި ހިދުމަތްކުރި އަހަރު ގުނަކުރުމުން ޖެހޭ އަދަދަށް ވާ ފައިސާ ލިބޭނެ އެވެ. އަދި މަހުން މަހަށް އެ މީހެއްގެ މުޅި އުމުރަށް ދެވޭ އިނާޔަތެއްގެ ގޮތުގައި އެ މީހަކު އެންމެ ފަހުން ހުރި ރޭންކަށް ކަނޑައަޅާފައިވާ މުސާރައިގެ 75 ޕަސެންޓް ރިޓަޔާމަންޓު ޕޭގެ ގޮތުގައި ދޭން ވާނެ އެވެ.
ނަމަވެސް އެ މީހަކު ހިދުމަތްކުރި އަހަރު 15 އަހަރަށް ވުރެ އިތުރުވެފައިވާ ނަމަ ގަނޑުކޮށް އެއްފަހަރާ ފައިސާ ދިނުމުގައި ބަލާނީ 15 އަހަރަށެވެ.
އީސީގެ މިހާރުގެ ރައީސް ފުއާދު ތައުފީގާއި ނައިބު ރައީސް އިސްމާއީލް ހަބީބު މިހާރު ތިއްބެވީ ދެވަނަ ދައުރުގަ އެވެ. އެގޮތުން ހަބީބުގެ ދައުރު މިއަދަށް ހަމަވާނެ އެވެ.
އީސީގައި ތިއްބަވަނީ 5 މެންބަރުންނެވެ.