އަންނަ މަހު ބާއްވާ ރައްޔިތުންގެ މަޖިލިސް އިންތިހާބުގައި ރާއްޖެ އިން ބޭރުގައި ވޯޓްފޮށި ބަހައްޓަން ނިންމި ގައުމުތަކުގައި ވޯޓްލާން ރަޖިސްޓްރީވާ މީހުން އަދިވެސް ވަރަށް މަދު ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
ވޯޓްފޮށި ބަހައްޓަން ނިންމީ ހަ ގައުމެއްގަ އެވެ. އެއީ އިންޑިއާ، ސްރީ ލަންކާ، މެލޭޝިއާ، ތައިލޭންޑް، ޔޫއޭއީ އަދި އިނގިރޭސިވިލާތެވެ. މިއިން ކޮންމެ ގައުމެއްގައި ވޯޓްފޮށި ބަހައްޓާނީ މަދުވެގެން 150 މީހުން ވޯޓްލާން ރަޖިސްޓްރީވެއްޖެ ނަމަ އެވެ.
ނަމަވެސް މިހާތަނަށް އެ އަދަދު ހަމަވީ އެންމެ ދެ ގައުމެއްގަ އެވެ. އެއީ ލަންކާ އާއި މެލޭޝިއާއިންނެވެ. އިއްޔެއާ ހަމައަށް ލަންކާ އިން 206 މީހަކު ރަޖިސްޓްރީކޮށްފައިވާ އިރު، މެލޭޝިއާ އިން 385 މީހަކު ރަޖިސްޓްރީކޮށްފައިވެ އެވެ. އިއްޔެއާ ހަމައަށް އިނގިރޭސިވިލާތުން 31، އިންޑިއާ އިން 24، ޔޫއޭއީ އިން ހައެއް އަދި ތައިލޭންޑުން ރަޖިސްޓްރީކޮށްފައި ވަނީ އެންމެ ހަތަރު މީހުންނެވެ.
މަޖިލިސް އިންތިހާބު ބާއްވަން ހަމަޖެހިފައި ވަނީ އަންނަ މަހުގެ 21 ގަ އެވެ. ވިހި ވަނަ މަޖިލީހުގެ 93 ދާއިރާއަކަށް 369 ކެންޑިޑޭޓުން ވާދަކުރެ އެވެ.