މާލޭގެ މަގުތަކަށް ކުނި އެޅުމުގެ މައްސަލަ މިހާރު ވަރަށް ބޮޑުވެފައިވާ އެކަމަށް ހައްލެއް ހޯދަން ކުރާ މަސައްކަތުގެ ތެރެއިން ކުނި އަޅާ މީހުން ހޯދައި އެ މީހުން ލައްވައި ކުނި ނަގުވައި މަގުތައް ސާފުކުރުވާނެ ކަމަށް ފުލުހުން ބުނެފި އެވެ.
ކުނީގެ މައްސަލައިގައި ފުލުހުން ނެރުނު ބަޔާނެއްގައި ބުނީ މާލޭގެ މަގުތަކަކީ ސާފުތާހިރު މަގުތަކަށް ހެދުމަށް މާލޭގައި އުޅޭ ހުރިހާ އެންމެންގެ އެހީތެރިކަމާއި އެއްބާރުލުން ބޭނުންވާ ކަމަށެވެ. އަދި މިއީ ފަރުދީ ގޮތުން ވެސް އަދާކުރަން ޖެހޭ ޒިންމާއެއް ކަމަށާއި ކުނިން ސަލާމަތްވުމަކީ ބަލިތަކުން ވެސް ރައްކާތެރިކޮށް ދޭނެ ކަމެއް ކަމަށް ފުލުހުން ބުންޏެވެ.
މަގުތަކަށް ކުނި އަޅާ މީހުން ހޯދައި ޖޫރިމަނާ ވެސް މިހާރު އަންނަނީ ކުރަމުންނެވެ. އެގޮތުން މިހާތަނަށް 100 އަށް ވުރެ ގިނަ މީހުން ޖޫރިމަނާކޮށްފައިވެ އެވެ. ޖޫރިމަނާ ކުރަނީ ކުނި އަޅާ މީހަކު 500ރ. އިންނެވެ.
ރޯދައާ ދިމާކޮށް ގޭތެރެ ސާފުކޮށް މާލޭގެ މަގުމައްޗަށް ކުނި ޖަމާކުރުން މުޅި މާލެތެރެ ގޮނޑުވެފައިވެ އެވެ. އެހެންވެ މާލެތެރެ ސާފުކުރުމުގެ މަސައްކަތް މާލެ ސިޓީ ކައުންސިލުން ވެސް އަންނަނީ ކުރަމުންނެވެ.