މި އަހަރު ރާއްޖޭގައި މެޑިކަލް ހެލިކޮޕްޓަރުގެ ހިދުމަތް ފަށަން ނިންމައިފި އެވެ.
މި ހިދުމަތް ފެށުމަށް ތައްތާރީތައް ވަމުން އަންނަ އިރު، މިކަމަށް ލީގަލް ކޮންސަލްޓަންޓަކު ހޯދަން ވެސް މި މަހުގެ ކުރީކޮޅު ޓްރާންސްޕޯޓް މިނިސްޓްރީން އިއުލާންކޮށްފައިވެ އެވެ.
ރާއްޖޭގެ އިގުތިސާދީ ސަރަހައްދު ބެލެހެއްޓުމަށް ތުރުކީން ގެނައި އަސްކަރީ ޑްރޯންތައް ލޯންޗްކުރަން ރޭ ނ. މާފަރު އިންޓަނޭޝަނަލް އެއާޕޯޓްގައި ރޭ ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ މި އަހަރު ނިމުމުގެ ކުރިން "ހެލިކޮޕްޓަރު ސާވިސް" ފަށާނެ ކަމަށެވެ.
"މިހާރު އިރާދަކުރެއްވީތީ އެވަނީ އަޅުގަނޑުމެންގެ އަމިއްލަ ކެޕޭސިޓީއެއް ކަމުގެ ގާއިމްކުރެވިފައި. ޑޭޝް8ގެ މަތިންދާބޯޓެއް އަދި ސީ ޕްލޭނެއް އެވަނީ މިހާރު އެއާ އެމްބިއުލާންސް ސާވިސްއަށް އިތުރުކުރެވިފައި،" ރައީސް ވިދާޅުވި އެވެ. "އަދި މިއަހަރު ނިމުމުގެ ކުރީގަ ހެލިކޮޕްޓަރު ސާވިސްގެ ތެރޭގަވެސް އަބަދު ބޭނުންކުރެވޭ މެޑިކަލް އިވެކުޢޭޝަންއަށް ބޭނުންކުރެވޭ ހެލިކޮޕްޓަރެއް ވެސް އޮންނާނެ،".
ރާއްޖޭގައި މިހާރު ކުއްލި ހާލަތުގައި ބޭނުންކުރާ ދެ ހެލިކޮޕްޓަރުގެ އިތުރުން ޑޯނިއާ މަތިންދާބޯޓެއް އޮވެ އެވެ. އެއީ އިންޑިއާ އިން ހަދީޔާފައިވާ ތަކެއްޗެވެ. ނަމަވެސް އެ ތަކެތީގެ އޮޕަރޭޝަނަށް ރާއްޖޭގައި ތިބޭ އިންޑިއާ ސިފައިން ފޮނުވާލުމުގެ މަސައްކަތްތައް ސަރުކާރުން ކުރަމުން އަންނަ އިރު، އެ ތަކެއްޗާ މެދު އަމަލުކުރާނެ ވަކި ގޮތެއް ސަރުކާރުން އަދި ހާމަކޮށްފައެއް ނުވެ އެވެ.
ރައީސް ވިދާޅުވި ގޮތުގައި ސަރުކާރުން މިހާރު މަސައްކަތް ކުރަނީ އަމިއްލަ ބާރުވެރިކަން އިތުރު ކުރުމަށެވެ.