އޮރިޔާން މަންޒަރު ދައްކުވައިދޭ ފޮޓޯ އަދި ވީޑިއޯ ބޭނުންކޮށްގެން ބްލެކްމޭލްކުރާ މައްސަލަތައް އިތުރުވެފައިވާ ކަމަށް ފުލުހުން ބުނެފިއެވެ.
މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި މައުލޫމާތުދެމުން ފުލުހުން ބުނެފައިވަނީ، އޮރިޔާން ފޮޓޯ ވީޑިއޯ ބޭނުންކޮށްގެން ބްލެކްމޭލް ކުރާ މައްސަލަތައް އިތުރުވެފައިވާ ކަމަށެވެ.
އެގޮތުން ކައިވެނި ކޮށްގެންއުޅޭ ފަރާތްތަކުން އަދި ރައްޓެހިވެގެން އުޅޭއިރު ނަގާފައިހުންނަ ބަރަހަނާ މަންޒަރު ދައްކުވައިދޭ ފޮޓޯ ވީޑިއޯގެ ބޭނުންކޮށްގެން ބްލެކްމޭލް ކުރުމުގެ މައްސަލަތައް ހިންގަމުންދާ ކަމަށެވެ. އަދި ސޯޝަލްމީޑިއާގެ އެޕްލިކޭޝަންތަކުން ދިމާވާފަރާތްތަކާއެކު ވީޑިއޯ ކޯލް ކޮށްގެން، އެކަކު އަނެކަކު ބަރަހަނާވެގެން ކުރާ ކަންތައްތަކުގެ ސަބަބުން ފަހުން ބްލެކްމޭލްވެގެން އެ މައްސަލަތައް ވެސް ހުށަހެޅޭ ކަމަށް ފުލުހުން މައުލޫމާތު ދީފައިވެއެވެ.
"މީގެއިތުރުުން މިހާރަކަށް އައިސް ހުށަހެޅޭ މައްސަލަތަކުގެ ތެރޭގައި ސޯޝަލްމީޑިއާގެ އެކި އެޕްލިކޭޝަންތައް ބޭނުންކޮށްގެން ބައްދަލުވުމަށް ގެސްޓްހައުސްތަކަށް ދައުވަތުދީގެން ދާދިއުމުގައި، އެ ގެސްޓްހައުސްއަށް ދިއުމުން ގަދަކަމުން ހިފަހައްޓާ ރޭޕްކޮށް ވީޑިއޯކޮށް އޮރިޔާން މަންޒަރު ދައްކައިދޭ ފޮޓޯ ނަގާ، އެކި ފަރާތްތައް ބްލެކްމޭލް ކުރަމުންދާކަން އިތުރުވަމުންދާކަން ފާހަގަކޮށްލަން." ފުލުހުން ބުނެފައިވެއެވެ.
އޮރިޔާން މަންޒަރު ދައްކުވައިދޭ ފޮޓޯ އަދި ވީޑިއޯ ބޭނުންކޮށްގެން ބްލެކްމޭލްކުރާ މައްސަލަތައް އިތުރުވަމުންދާކަން ފުލުހުން ހާމަކުރިއިރު، މިފަދަ މައްސަލަތަކުގައި އެއްވެސް މީހަކު ހައްޔަރުކުރިކަމެއް ފުލުހުން ހާމަކޮށްފައެއް ނުވެއެވެ.
މި ޕްރެސް ކޮންފަރެންސްގައި ފުލުހުން ވަނީ އެއިދާރާގެ ކްރައިމް އިންވެސްޓިގޭޝަން ކޮމާންޑުން ތަހުގީގުކުރަމުންދާ މައްސަލަތަކާގުޅޭ މައުލޫމާތުތައް ހިއްސާކޮށްފައެވެ.