ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯ އަދި ވީޑީއޯ ސޯޝަލްމީޑިއާގެ އެކި ވަސީލަތްތަކުން ޑައުންލޯޑްކުރި މައްސަލަތަކެއް ތަހުގީގު ކުރަމުންދާ ކަމަށް ފުލުހުން ބުނެފިއެވެ.
ފުލުހުންގެ ކްރައިމް އިންވެސްޓިގޭޝަން ކޮމާންޑުން ތަހުގީގުކުރަމުންދާ މައްސަލަތަކާގުޅޭ މައުލޫމާތުތައް ހިއްސާކުރުމަސް މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި މައުލޫމާތުދެމުން ފުލުހުން ބުނެފައިވަނީ ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯ އަދި ވީޑީއޯ ސޯޝަލްމީޑިއާގެ އެކި ވަސީލަތްތަކުން ޑައުންލޯޑް ކުރާ ފަރާތްތަކުގެ މައުލޫމާތު، މިފަދަ ކަންކަން މޮނީޓަރ ކުރާ ބޭރުގެ ލޯ އެންފޯސްމެންޓް އެޖެންސީތަކުން ފުލުހުންނަށް ހިއްސާ ކޮށްފައިވާ ކަމަށެވެ.
އެފަދަ މައްސަލަތަކަކާ ގުޅިގެން ދެ މައްސަލައެއްގެ ތަހުގީގު ފަށާފައިވާ ކަމަށާއި، އޭގެން އެއް މައްސަލައެއް ތަހުގީގު ނިންމާ ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް މިހާރު ހުށަހެޅިފައިވާ ކަމަށް ފުލުހުން ބުނެފައިވެއެވެ. އަދި ދެވަނަ މައްސަލައިގެ ތަހުގީގު މިހާރު ކުރިއަށްދާ ކަމަށްވެސް ފުލުހުން މައުލޫމާތުދީފައިވެއެވެ.
ސޯޝަލްމީޑިއާގެ އެކި ވަސީލަތްތައް ބޭނުންކޮށްގެން ދިވެހިރާއްޖެއަށް ނިސްބަތްވާ އައިޑީތަކާއި ފޯނު ނަންބަރުތަކުން މިގޮތަށް ޑައުންލޯޑްކުރާ ކުޑަކުދިންގެ ފޮޓޯ އަދި ވީޑިއޯގެ މައްސަލަތައް ވަރަށް ސީރިއަސްކޮށް ބަލަމުންގެންދާނެ ކަމަށް ފުލުހުން ބުނެފައިވެއެވެ.
މީގެއިތުރުން ކުޑަކުދިންނަށް އެކިކަހަލަ ގޯނާ ކޮށްގެން ހުށަހެޅޭ މައްސަލަަތައް އިތުރުވަމުންދާކަން ފާހަގަކޮށް ފުލުހުން ބުނެފައިވަނީ މިފަދަ މައްސަލަތަކަކީ ވަރަށް ޚައްސާސް މައްސަލަތަކަށްވުމުން މިފަދަ މައްސަލައެއްގެ މައުލޫމާތު ލިބޭހިސާބުން އަދި ކުއްޖަކަށް ކޮންމެ ބާވަތެއްގެ އަނިޔާއެއް ލިބުނު ކަމަށްވިނަމަވެސް އެކަން ސިއްރު ނުކޮށް ފުލުހުންނަށް ވީހާވެސް އަވަހަކަށް ހިއްސާ ކުރުމަށް ވަނީ އިލްތިމާސް ކޮށްފައެވެ. ފުލުހުން ބުނެފައިވަނީ ބައެއް ފަހަރު މިފަދަ މައްސަލަތައް ރިޕޯޓް ކުރުމުގައި ވަރަށް ބޮޑަށް ލަސްވާ ކަމަށާއި އަދި ބައެއް ފަރާތްތަކުން މިފަދަ މައްސަލަތައް ސިއްރު ކުރުމަށް މަސައްކަތް ކުރާކަންވެސް ފާހަގަ ކުރެވޭ ކަމަށެވެ.