ސްކޭމް ކޯލްތަކުގެ މައްސަލައިގައި މާފުށީ ޖަލު ބަލާފާސްކޮށް 22 އަށްވުރެއް ގިނަ ފޯނު އަތުލައިގަނެފައިވާ ކަމަށް ފުލުހުން ބުނެފިއެވެ.
ފުލުހުންގެ ކްރައިމް އިންވެސްޓިގޭޝަން ކޮމާންޑުން ތަހުގީގުކުރަމުންދާ މައްސަލަތަކާގުޅޭ މައުލޫމާތުތައް ހިއްސާކުރުމަށް މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި މައުލޫމާތުދެމުން ފުލުހުން ބުނެފައިވަނީ، ޖަމިއްޔާއެއްގެ އެކައުންޓުން 500،000 އެއްހާ ރުފިޔާ އޮޅުވާލައިގެން ވަގަށް ނަގާފައިވާ މައްސަލައިގައި ޖުމުލަ 40 ފަރާތެއްގެ އެކައުންޓަށް އެ ފައިސާ ދައުރުކޮށްފައިވާކަން ތަހުގީގަށް ހޯދިފައިވާ ކަމަށެވެ.
މި މައްސަލައާ ގުޅިގެން ގިނަ ތަންތަނެއް ބަލާފާސްކޮށްފައިވާ ކަމަށާއި، އެގޮތުން ބައެއް ގެތަކާއި މީހުން ބަލާފާސްކޮށް މައްސަލައާ ގުޅުންހުރި ހެކި ގަރީނާ މިހާރު ހޯދާފައިވާ ކަމަށެވެ.
ފުލުހުން ބުނެފައިވަނީ މި މައްސަލައިގައި ހޯދިފައިވާ ހެކި ގަރީނާއިން އެނގޭގޮތުން ސްކޭމް ކޯލް ކޮށްފައިވަނީ މާފުށީ ޖަލުންކަމަށެވެ. އެހެންކަމުން މާފުށީ ޖަލު މާޗް 7 ވަނަ ދުވަހު ބަލާ ފާސްކޮށްފައިވާ ކަމަށް ފުލުހުން ބުނެފައިވެއެވެ.
މި ބަލާފާސްކުރުމުގެ ތެރެއިން ގިނަ އަަދަދެއްގެ ސްމާޓް ފޯނު ހިމެނޭގޮތަށް 22 އަށްވުރެއް ގިނަ ފޯނު ފުލުހުންގެ ބެލުމުގެ ދަށަށް ވަނީ ގެނެވިފައިވާ ކަމަށް ބުނެފައިވެއެވެ. އަދި ފޯނުގެ އިތުރުން ސިމްކާޑު، ސްޓޯރޭޖް ޑިވައިސަސް، ބެޓެރި، ޕަވަބޭންކް އަދި ހެޑްސެޓްފަދަ ވަރަށް ގިނަ އާލާތްތައްވެސް ހޯދިފައިވާ ކަމަށް ފުލުހުން މައުލޫމާތު ދީފައިވެއެވެ.