ޔޫތު މިނިސްޓްރީގެ "ނެޝަނަލް އެޕްރެންޓިސްޝިޕް ޕްރޮގުރާމް" ގެ ދަށުން 43 ޒުވާނުން ގްރެޖްއޭޓްވެއްޖެ އެވެ.
އެ ޕްރިގްރާމް ނިންމަން ޝެރަޓަން މޯލްޑްވްސް ފުލްމޫން ރިސޯޓު އެންޑް ސްޕާގައި އިއްޔެ ބޭއްވި ރަސްމިއްޔާތުގައި ގްރެޖުއޭޓުންނަށް ސެޓްފިކެޓު ހަވާލުކޮށްދެއްވީ ޔޫތު މިނިސްޓަރު އިބްރާހިމް ވަހީދު (އަސްވާޑު) އެވެ.
މިނިސްޓްރީ އާއި މެރިއަޓް ގުޅިގެން ހިންގި ޕްރޮގުރާމުގައި 43 ޒުވާނުން ގްރެޖުއޭޓުވެފައިވާއިރު އޭގެ ތެރެގައި 21 ޒުވާނުންނަށް ވަނީ ވަޒީފާގެ ފުރުސަތު ޔަގީންވެފަ އެވެ.
ބައިވެރިން ގްރެޖުއޭޓުވި ދާއިރާތަކުގެ ތެރޭގައި ނެޝަނަލް ސެޓްފިކެޓް 3 އިން ފްރޮންޓް އޮފިސް، ނެޝަނަލް ސެޓްފިކެޓް 3 އިން ހައުސްކީޕިން، ނެޝަނަލް ސެޓްފިކެޓް 3 އިން ލޯންދަރީ ސާވިސަސް، ނެޝަނަލް ސެޓްފިކެޓް 3 އިން ކޮމާޝަލް ކުކަރީ
ނެޝަނަލް ސެޓްފިކެޓް 3 އިން ޕޭސްޓްރީ އެންޑް ބޭކަރީ، ނެޝަނަލް ސެޓްފިކެޓް 3 އިން ލައިފް ގާޑިން، ނެޝަނަލް ސެޓްފިކެޓް 3 އިން ބަރިސްޓާ، ނެޝަނަލް ސެޓްފިކެޓް 3 އިން އިލެކްޓްރިކަލް އިންސްޓްލޭޝަން އެންޑް މެއިންޓެއިންސް އަދި ފުޑް އެންޑް ބެވަރޭޖް ސާވިސަސް ހިމެނެ އެވެ.
މިނިސްޓްރީން މި ޕްރޮގްރާމް ހިންގާފައި ވަނީ ޝެރަޓަން މޯލްޑިވްސް، ޖޭޑަބްލިއު މެރިއޮޓް މޯލްޑިވްސް، ލެ މެރިޑިއަން މޯލްޑިވްސް، ރިޓްސް ކާރްލްޓޮން މޯލްޑިވްސް، އެސްޓީ. ރެގިސް މޯލްޑިވްސް، ޑަބްލިއު މޯލްޑިވަސް އަދި ވެސްޓިން މޯލްޑިވްސްގަ އެވެ.
މިނިސްޓްރީއިން ބުނި ގޮތުގައި ޕްރޮގްރާމްގައި މޯލްޑިވްސް އިންސްޓިއުޓިއުޓް އޮފް ޓެކްނޮލޮޖީން މުހިންމު ދައުރެއް އަދާކޮށްފައިވެ އެވެ.
ނެޝަނަލް އެޕްރެންޓިސްޝިޕް ޕްރޮގުރާމަކީ މަސައްކަތުގެ މާހައުލުގައި ތިބެގެން އެ މަސައްކަތުގެ ތަޖުތިބާކާރުންގެ ބެލުމުގެ ދަށުން މަސައްކަތްތައް ދަސްކޮށް، ތަމްރީނާއި ތަޖުރިބާ ހޯދުމުގެ ފުރުސަތު ގައުމީ ފެންވަރުގައި ހުޅުވާލައިގެން ކުރިއަށް ގެންދާ ޕްރޮގުރާމެކެވެ. މި ޕްރޮގުރާމުގެ މަގުސަ ތަކުގެ ތެރޭގައި މަސައްކަތްތެރިކަމުގެ ދާއިރާގެ ތަމްރީނު ހޯދުމަށް ޝައުޤުވެރިވާ ހުރިހާ އުމުރެއްގެ ދިވެހީންނަށް މަސައްކަތްތެރިކަމުގެ ދާއިރާއިން ސަރުކާރު ޤަބޫލުކުރާ ފެންވަރުގެ ތަމްރީނު ހޯދުމުގެ ފުރުޞަތު ފަހިކޮށްދިނުން ހިމެނެ އެވެ.