އަންނަ މަހު ބާއްވަން ހަމަޖެހިފައިބާ ރައްޔިތުންގެ މަޖިލީހުގެ އިންތިޚާބު އޮބްޒަވްކުރުމާއި މޮނިޓަރކުރުމުގެ އިތުރުން ކެންޑިޑޭޓުންގެ މަންދޫބަކަށްވުމަށް އެދި ހުށައެޅުމަށް އިތުރު ފުރުޞަތެއް ދޭން ދިނުމަށް އިލެކްޝަންސް ކޮމިޝަން އީސީ) އިން ނިންމައިފި އެވެ.
އެ ކޮމިޝަނުން ބުނީ އެކަމަށް އިތުރު ފުރުސަތެއް ދޭން ނިންމީ ކުރިން އިއްޔެ ބާއްވަން ނިންމި އިންތިހާބު އަންނަ މަހުގެ 21 އަށް ފަސްވެފައިވާތީ ކަމަށެވެ. އެހެންވެ އިންތިހާބު އޮބްޒަވްކުރުމާއި މޮނީޓަރުކަމާއި މަންދޫބުންވުމުގެ ފުރުޞަތު އިލެކްޝަންސް މާދަމާ އިން ފެށިގެން މި މަހުގެ 21 އާ ހަމައަށް އޮންނާނެ އެވެ.
އީސީން ބުނެފައިވާ ގޮތުގައި މިހާތަނަށް ޖުމްލަ 9،942 މީހަކު އޮބްޒަރވަރުންނާއި މޮނިޓަރުންނާއި ކެންޑިޑޭޓުންގެ މަންދޫބުންގެ ގޮތުގައި ކުރިމަތިލާފައިވެ އެވެ. އެގޮތުން 5،032 މީހަކު މޮނިޓަރކުރުމަށް އެދި ކުރިމަތިލާފައިވާ އިރު 2،968 މީހަކު އޮބްޒަރވްކުރުމަށް އެދި ކުރިމަތިލާފައިވެ އެވެ. އަދި 1،942 މީހަކު ކެންޑިޑޭޓުންގެ މަންދޫބުންގެ ގޮތުގައި ކުރިމަތިލާފައިވެއެވެ.
އީސީން ބުނީ މަންދޫބުން ބަދަލުކުރަން ބޭނުންވާ ނަމަ ކެންޑިޑޭޓުންނަށް އެ ފުރުޞަތު ވެސް އޮންނާނެ ކަމަށެވެ.
އިންތިޚާބުތަކުގައި އޮބްޒާވަރުންގެ ގޮތުގައި ހަރަކާތްތެރި ވާނީ ސިޔާސީ ޕާޓީތަކާއި މަދަނީ ޖަމިއްޔާތަކުގެ ފަރާތުން އިންތިޚާބުގެ ކަންކަން ކުރިއަށްދާ ގޮތް ބެލުމަށް ވޯޓުލާ މަރުކަޒުތަކުގައި ހަރަކާތްތެރިވުމަށް ރަޖިސްޓްރީ ކުރާ ފަރާތްތަކެވެ. އަދި މޮނިޓަރުންގެ ގޮތުގައި ހަރަކާތްތެރި ވާނީ މޯލްޑިވްސް ބްރޯޑްކާސްޓިން ކޮމިޝަންގައި ރަޖިސްޓްރީކޮށްފައިވާ ފަރާތްތަކުގެ ތެރެއިން އީސީން ހުއްދަ ދޫކުރާ ފަރާތްތަކެވެ.