ރާއްޖޭގެ އެކި ރަށްރަށުގައި ހޮސްޕިޓަލް އެޅުމަށް ކުވައިތު ފަންޑުން ދީފައިވާ އެހީ އަނބުރާ ގެންގޮސްފައިވާ ކަމަށް ހެލްތް މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރި ސުވާލުތަކަށް ޖަވާބު ދެއްވަމުން މިނިސްޓަރު ޚަލީލް ވިދާޅުވީ ކުވައިތު ފަންޑުން ދީފައިވާ އެހީ އަނބުރާ ގެންގޮސްފައިވާ ކަމަށެވެ. އެ ފަންޑު އަނބުރާ ގެންގޮސްފައިވަނީ ފަންޑުގެ ޕްރޮކިއުމަންޓް އުސޫލާ ހިލާފަށް އޭރު ރާއްޖެއިން އެވޯޑްކުރުމުގެ މަރުހަލާ ކުރިއަށް ގެންދަން ބޭނުންވުމުން ކަމަށެވެ.
މިނިސްޓަރު ޚަލީލް ވިދާޅުވީ އިންޓަނޭޝަނަލް ފަންޑިން އެޖެންސީތަކަކީ އެ އެޖެންސީތަކުން ކަނޑައަޅާ އުސޫލެއްގެ ތެރެއިން ޕްރޮކިއުމަންޓް ކަންކަން ކުރިއަށްގެންދަންޖެހޭ އެޖެންސީތަކެއްކަމަށެވެ.
މި ސަރުކާރުން އެ ފަންޑު އަނބުރާ ހޯދުމަށް މަސައްކަތް ކުރަމުންދާ ކަމަށް މިނިސްޓަރު ޚަލީލް ވިދާޅުވިއެވެ. އަދި ހޮސްޕިޓަލްތައް އެޅުމަށް ބޭނުންވާ ފަންޑު އެހެން ގޮތަކުން ހަމަޖެހޭތޯ މަސައްކަތް ކުރަމުންދާކަންވެސް ފާހަގަ ކުރެއްވިއެވެ.