ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ބަހައްޓާނީ ޖުމުލަ 602 ވޯޓު ފޮށި ކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އީސީން މިއަދު ބުނެފައިވަނީ ޖުމުލަ 602 ވޯޓު ފޮށި މަޖިލިސް އިންތިހާބަށް ބަހައްޓާއިރު އަތޮޅުތެރޭގައި 319 ވޯޓު ފޮށި ބަހައްޓާނެ ކަމަށެވެ.
އެއް ރަށެއްގައި އެންމެ ގިނަ ވޯޓު ފޮށި މި އިންތިހާބުގައި ބަހައްޓަނީ މާލޭގައެވެ. އެގޮތުން މާލޭގައި 181 ވޯޓު ފޮށި ބަހައްޓާއިރު ހުޅުމާލޭގައި 51 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ. އަދި ވިލިމާލޭގައި 9 ވޯޓު ފޮށި ބަހައްޓާނެއެވެ.
ރިސޯޓްތަކުގައި 34 ވޯޓު ފޮށި ބަހައްޓާއިރު ޖަލު ތަކުގައި 5 ވޯޓު ފޮށި، ރާއްޖެއިން ބޭރުގައި 3 ވޯޓު ފޮށި ބަހައްޓާނެއެވެ. މިއިންތިހާބުގައި ސިނާއީ އެއްވެސް ރަށެއްގައި ވޯޓު ފޮށި ނުބަހައްޓާގޮތަށް ވަނީ ހަމަޖެހިފައެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އޭޕްރިލް 21 ވަނަ ދުވަހުއެވެ. ވިހި ވަނަ މަޖިލިސް އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެއެވެ.