އެކި މަޝްރޫއުތަކަށް ނުދައްކާހުރި ފައިސާގެ ތެރެއިން 90 މިލިއަން ރުފިޔާ މިހާރު ދައްކާފައިވާ ކަމަށް އެޑިއުކޭޝަން މިނިސްޓަރު އިސްމާއިލް ޝަފީއު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މިނިސްޓަރު ޝަފީއު ވިދާޅުވީ، މަގާމާ ހަވާލުވިއިރު ސްކޫލްތަކާ ގުޅޭ ގިނަ މަޝްރޫއުތަކެއް ހިންގަމުންދިޔަ ކަމަށެވެ. އެގޮތުން 107 މަޝްރޫއެއް ހިނގަމުންދިޔަ ކަމަށާއި އޭގެތެރެއިން ގިނަ މަޝްރޫއުތަކަކަށް ދައްކަންޖެހޭ ފައިސާގެ ލަސްތަކެއް ހުރުމުން ބައެއް މަޝްރޫއުތައް ހުއްޓިފައިވާ ކަމަށެވެ.
މިނިސްޓަރު ޝަފީއު ވިދާޅުވީ ވަރަށް ގިނަ މަސައްކަތްތަކުގެ ޕޭމަންޓް ޑިލޭ ހުރި ކަމަށާއި އެގޮތުން 128 މިލިއަން ރުފިޔާ ދައްކަން އޮތް ކަމަށެވެ. އެހެންކަމުން މަގާމާ ހަވާލުވެ އެންމެ ބޮޑު އިސްކަމެއް ދިނީ ހުއްޓިފައިވާ މަޝްރޫއުތައް ވީހާވެސް އަވަހަށް ފެށުމަށް ކަމަށެވެ.
"އެގޮތުން ގާތްގަނޑަކަށް އެބިލުތަކަށް 90 މިލިއަނެއްހާ ރުފިޔާ، 128 މިލިއަން ރުފިޔާގެ ތެރެއިން، އަޅުގަނޑުމެނަށް ދެއްކިއްޖެ." މިނިސްޓަރު ޝަފީއު ވިދާޅުވިއެވެ.
އެޑިއުކޭޝަން މިނިސްޓަރު ވިދާޅުވީ މަގާމާ ހަވާލުވިއިރު 107 މަޝްރޫއު ހިނގަމުންދިޔަ ކަމަށާއި އަދި މިހާރު ފެށިފައިވާ މަޝްރޫއުތަކާއެކު ޖުމުލަ 130 މަޝްރޫއެއް ކުރިއަށްދާ ކަމަށެވެ.