ކުރީ ސަރުކާރުން ދިރާސީ އަހަރަށް ބަދަލު ގެނެސްފައިވަނީ އެކަމަށް ހިޔާލު ހޯދި މީހުންގެ ތެރެއިން ގިނަ ބައެއްގެ ހިޔާލާ ދެކޮޅަށް ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވަނީ، ދިރާސީ އަހަރަށް ބަދަލުގެންނަ ގެނައުމާ ގުޅޭގޮތުން ސުވާލު ކޮށްފައެވެ. ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ދިރާސީ އަހަރުގެ ފެށުން އަހަރު މެދަށް ބަދަލުކުރިއިރު މިސަރުކާރުން ވަނީ އަލުން ދިރާސީ އަހަރު ޖެނުއަރީގައި ފަށަން ނިންމައިފަައެވެ.
މި ސުވާލަށް ޖަވާބު ދެއްވަމުން އެޑިއުކޭޝަން މިނިސްޓަރު ޑރ. ޝަފީއު ވިދާޅުވީ ކުރީ ސަރުކާރުން ދިރާސީ އަހަރު ބަދަލުކޮށްފައިވާގޮތް ބެއްލެވި ކަމަށެވެ. އަދި އެގޮތަށް ބެލިއިރު އެ ބަދަލު ގެނައުމާ ގުޅޭގޮތުން 30،000 މީހުންގެ ހިޔާލު ހޯދާފައިއޮތްކަން އެނގުނު ކަމަށް ވިދާޅުވިއެވެ.
މިނިސްޓަރު ވިދާޅުވީ ކުރީ ސަރުކާރުން ދިރާސީ އަހަރު ބަދަލުކޮށްފައިވަނީ ހިޔާލު ހޯދި 30،000 މީހުންގެ ތެރެއިން 70 އިންސައްތަ މީހުންގެ ހިޔާލާ ދެކޮޅަށް ކަމަށެވެ. ޝަފީއު ވިދާޅުވީ އެކަޑެމިކް ކަލަންޑަރާ ކުޅެން ރައްޔިތުން އަދި ޓީޗަރުން ނޭދޭ ކަމަށެވެ.
މިސަރުކާރުން ނިންމާފައިވަނީ 2026 ވަނަ އަހަރުން ފެށިގެން ދިރާސީ އަހަރު ޖެނުއަރީ މަހުން ފަށާގޮތަށް ބަދަލުކުރުމަށެވެ.