ބުޅާތައް ގެންގުޅޭނެ 'ޕެޓް ކެއަރ ފެސިލިޓީ' ގާއިމުކުރުމުގެ އަމަލީ މަސައްކަތް ފަށައިފިއެވެ.
މާލޭގެ މަގުތަކުގައި ގިނަވަމުންދާ ބުޅާތައް ގެންގުޅޭނެ 'ޕެޓް ކެއަރ ފެސިލިޓީ' ގާއިމުކުރުމުގެ ޕެރޮޖެކްޓަކީ މާލެސިޓީ ކައުންސިލާއި މިނިސްޓްރީ އޮފް އެގްރިކަލްޗާރ އެންޑް އެނިމަލް ވެލްފެއާރއިން ކުރިއަށް ގެންދާ ޕްރެޖެކްޓެކެވެ.
މި ޕްރޮޖެކްޓްގެ ދަށުން މި ވަގުތު ފަށާފައިވަނީ ކެޓު ޝެލްޓަރ އެއް ޤާއިމުކުރުމުގެ މަސައްކަތެވެ. އަދި ޕްރޮޖެކްޓް ނިމޭ އިރު އެކި ވައްތަރުގެ ޕެޓު ކެއާރ ފެސިލީޓީ އެއް ޤާއިމު ކުރެވިގެންދާނެ ކަމަށް ސިޓީ ކައުންސިލުން މައުލޫމާތުދެއެވެ.
މި މަސައްކަތް ފެއްޓެވުމަށްފަހު މީޑިއާއަށް މައުލޫމާތު ދެއްވަމުން މާލެސިޓީ މޭޔަރު އާދަމް އާޒިމް ވިދާޅުވީ ބުޅަލުގެ މައްސަލައަކީ މާލެއަށް ބޮޑަށް ދަތިވެފައިއޮތް މައްސަލައެއް ކަމަށެވެ. އަދި އުންމީދު ކުރަނީ ދެ މަސްތެރޭ މި ފެސިލިޓީ ގާއިމުކުރެވުމަށް ކަމަށްވެސް ވިދާޅިވިއެވެ.
މި ޕްރޮޖެކްޓްގެ ދަށުން މާލެ ސަރަހައްދުގައި ގާއިމުކުރެވިގެންދާ ވަގުތީ ޝެލްޓަރ އިމާރަތް ކުރުމަށް ހަމަޖެހިފައިވަނީ ހުޅުމާލޭގައެވެ. ކެޓް ޝެލްޓަރ އަޅަން ހުޅުމާލެއިން ވަނީ 5،000 އަކަފޫޓުގެ ބިމެއް ދީފައެވެ.
ސިޓީ ކައުންސިލުން ބުނެފައިވަނީ ކުރިއަށް އޮތް 20 ދުވަސްތެރޭ ފެންސް ޖަހާ ނިމޭނެ ކަމަށެވެ. އަދި އިމާރާތުގެ މަސައްކަތް މި އަންނަ ހަފުތާގައި ފެށިގެންދާނެ ކަމަށެވެ.