މި ސަރުކާރުގެ ސިޔާސަތަކީ ހުރިހާ ރަށެއްގައިވެސް ފުލުހުންގެ ހިދުމަތް ގާއިމުކުރުން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ ރައީސް ޑރ. މުހައްމަދު މުއިއްޒުގެ ސިޔާސަތަކީ ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ގާއިމުކޮށް ހިދުމަތް ދިނުން ކަމަށެވެ.
ރާއްޖޭގައި މިވަގުތު ފުލުހުންގެ ހިދުމަތް ނެތް 46 ރަށް އޮތްކަން ފާހަގަކޮށް މިނިސްޓަރު އިހުސާން ވިދާޅުވީ އަމާޒަކީ 2027 ގެ ކުރިން މި ރަށްރަށުގައި ފުލުހުންގެ ހިދުމަތް ގާއިމު ކުރުން ކަމަށެވެ.
މިދިޔަ ސަރުކާރުގައި ރާއްޖޭގެ އެކި ރަށްރަށުގައި ޕޮލިސް ސްޓޭޝަންތައް ގާއިމު ކުރުމަށް އެކި ފަރާތްތަކާ ހަވާލުކޮށްފައިވާ ޕްރޮޖެކްޓްތަކާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ ޕޮލިސް ސްޓޭޝަން ގާއިމު ކުރުމަށް މިހާރު ދީފައިހުރި ޕްރޮޖެކްޓްތައް ހުޓުވުމުގެ ވިސްނުމެއް ނެތް ކަމަށެވެ. އެހެންނަމަވެސް މިގޮތަށް ދީފައިވާ ޕްރޮޖެކްޓްތަކުގެ ތެރޭގައި ހުއްޓިފައިހުރި މަސައްކަތްތަކެއް ހުރިކަމަށާއި އެ މަސައްކަތްތައް ފެށުމަށް ކުރަންޖެހޭ މަޝްވަރާތައް ކުރައްވާކަމަށް ވިދާޅުވިއެވެ.
މިނިސްޓަރު އިހުސާން ވިދާޅުވީ މިސަރުކާރު ހަވާލުވިފަހުން 19 ރަށެއްގައި ފުލުހުން ހިދުމަތް ފަށާފައިވާ ކަމަށެވެ. އަދި އެކި ރަށްރަށުގައި ޕޮލިސް ސްޓޭޝަންތައް ކުށްޔައް ނަގާފައިވާ އިމާރާތްތަކުގެ ހިންގާއިރު، އަމިއްލަ އިމާރާތުގައި ހިދުމަތް ދިނުމުގެ މަސައްކަތްވެސް ކުރައްވާ ކަމަށް ވިދާޅުވިއެވެ.