ބަންގްލަދޭޝްގެ މަސައްކަތްތެރިންގެ ގޮތުގައި 135،149 އެކްޓިވް ވޯކްޕާމިޓް ދޫކޮށްފައިވާއިރު ގަވައިދުން ފައިސާ ދައްކަނީ 39،004 ވޯކްޕާމިޓަށް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ 17 ޑިސެމްބަރު 2023 ގެ ނިޔަލަށް ރާއްޖޭގައި 90،624 ބަންގްލަދޭޝް މަސައްކަތްތެރިން ތިބި ކަމަށެވެ.
ބަންގްލަދޭޝްގެ އެކްޓިވް ވޯކްޕާމިޓްގެ ގޮތުގައި 135،149 ވޯކްޕާމިޓް ވާކަން ފާހަގަކޮށް މިނިސްޓަރު އިހުސާން ވިދާޅުވީ މީގެތެރެއިން ގަވައިދުން ފައިސާ ދައްކަނީ 39،004 ވޯކްޕާމިޓަށް ކަމަށެވެ. މިނިސްޓަރު ވިދާޅުވީ އެކްޓިވް ވޯކްޕާމިޓްގެ ގޮތުގައި 135،149 ވޯކްޕާމިޓް ފެނުނު ނަމަވެސް، ބޯޑާ ކޮންޓްރޯލް ސިސްޓަމުން ބަލާއިރުގައި މީގެން ގިނަ މީހުންނަކީ ރާއްޖެ ދޫކޮށް ގޮސްފައި ތިބި މީހުން ކަމަށެވެ.
މިނިސްޓަރު އިހުސާން ވިދާޅުވީ ބިދޭސީއަކު ފިލުމުން ނުވަތަ މައްސަލައެއް ދިމާވުމުން އެމީހާ ގެންނަ ފަރާތުން ސަރުކާރުގެ އިދާރާތަކާ ކުރަންޖެހޭ މުއާމަލާތް ރަނގަޅަށް ނުކުރާ ކަމަށެވެ.
"މިސިންއަށް ލުމަކީ އެމީހާ ރާއްޖެއިން ގޮއްސިކަމުގެ ހެއްކެއް ކަމަށް އަދި ނުބެލެވޭ. ހަމައެއާއެކު މިސިންގައި ހުންނަ މީިހާ ފުރައިގެން ދިއުމަށްފަހު ވެސް އެބަހުރި، އެމީހާ ކޮމްޕްލީޝަނަކަށް ނުގޮސް ވޯކްޕާމިޓް ކެންސަލް ނުކޮށް." މިނިސްޓަރު އިހުސާން ވިދާޅުވިއެވެ.
މީގެއިތުރުން މިނިސްޓަރު އިހުސާން ވިދާޅުވީ އެކްޓިވް ވޯކްޕާމިޓްގެ ތެރޭގައި، އަދި ރާއްޖެ ނާންނަ މީހުންނާއި، ރާއްޖެ އައުމަށްފަހު އަނބުރާ ދޫކޮށް ގޮއްސަ އެ ކުންފުންޏަކުން ޕާމިޓް ކެންސަލް ނުކުރާ ޕާމިޓްތައްވެސް ހިމެނޭ ކަމަށެވެ.
އިހުސާން ވިދާޅުވީ މަަސައްކަތް ކުރަމުންއަންނަނީ އެއް އަހަރުތެރޭ ރާއްޖޭގައި އުޅޭ ހުރިހާ ބިދޭސީންގެ ފިންގަޕްރިންޓް ނަގާ ޑާޓާ ބޭސްއެއް ހެދުމަށްކަމަށެވެ. އަދި ރައްޖޭގައި ގަވައިދާ ހިލާފަށް އުޅޭ ބިދޭސީން ޑީޕޯޓް ކުރަމުން ގެންދާ ކަމަށްވެސް ވިދާޅުވިއެވެ.