ލިބިފައިވާ މަގާމުގެ ނުފޫޒު ބޭނުންކޮށް ދިވެހިރާއްޖެއަށް ބިދޭސީން އެތެރެކޮށް މަގުމައްޗަށް ދޫކުރާ މީހުން ފާހަގަކުރެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރާ ސުވާލު ކުރުމަށް ލިބުނު ފުރުސަތުގައި މެންބަރު އިމްތިޔާޒް ފަހުމީ ވަނީ ބިދޭސީން ރާއްޖެއަށް އެތެރެވަނީ ދައުލަތުގެ މުވައްސަސާތަކުގެ ބައިވެރިވުމާ އެކުކަމަށް ތުހުމަތު ކުރައްވާފައެވެ. އަދި އެފަދަ މައްސަލައަކާ ގުޅޭގޮތުން މިނިސްޓަރާ ސުވާލު ކުރެއްވިއެވެ.
އެ ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ، މުވައްސަސާތަކުގައި ތިބި ބައެއް މީހުންގެ އިހުމާލު މިކަންކަމުގައި ވަރަށް ބޮޑަށް އޮތް ކަމަށެވެ. އެގޮތުން ބައެއް މުވައްސަސާތަކުގައި ލިބިފައިވާ މަގާމުގެ ނުފޫޒު ބޭނުންކޮށް ދިވެހިރާއްޖެއަށް ބިދޭސީން އެތެރެކޮށް މަގުމައްޗަށް ދޫކުރާ މީހުން ފާހަގަކުރެވިފައިވާ ކަމަށް މިނިސްޓަރު ވިދާޅުވިއެވެ. އަދި އެކަން ތަހުގީގު ކުރާކަމަށްވެސް ވިދާޅުވިއެވެ.
"ކަނޑައެޅިގެން މީގެތެރޭގައި އެބަތިބި، އަޅުގަނޑުމެންނަށް މިހާރު ފާހަގަކުރެވި ތަހުގީގުވެސް ކުރެވެމުން އެބަދޭ، މަގާމުގައި ލިބިފައިވާ އޮތޯރިޓީ ނަހަމަގޮތުގައި ބޭނުންކޮށްގެން ދިވެހިރާއްޖެއަށް، މިއޮތް ލޫޕްހޯލްގެ ތެރެއިން، ޤާނޫނާއި ގަވައިދާ ހިލާފަށް ބިދޭސީން އެތެރެކޮށް މަގުމައްޗަށް ދޫކޮށްލާކަން ފާހަގަކުރެވިފައި އެބައޮތް." މިނިސްޓަރު އިހުސާން ވިދާޅުވިއެވެ.
މިނިސްޓަރު ވިދާޅުވީ އެފަދަ ފަރާތްތަކާމެދު މި ސަރުކާރުން ހަރުކަށި ޤާނޫނީ ފިޔަވަޅު އަޅާނެ ކަމަށެވެ.
މީގެއިތުރުން އިތުރު މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލައަކީ ގައުމީ ސަލާމަތަށް ނުރައްކާވާފަދަ މައްސަލައެއް ކަމަށެވެ. އެހެންކަމުން މި މައްސަލަ ހައްލުކުރުމަށް މަސައްކަތް ކުރައްވަނީ ހާއްސަ ޓާސްކްފޯސްއަކާ އެކު ކަމަށާއި، ކުރިއަށް އޮތް އެއް އަހަރުގެ ތެރޭގައި މިކަން ގާނޫނީ ހަމަތަކުގެތެރެއަށް ގެންނަވާނެ ކަމަށެވެ.