ސިނަމާލެ ބްރިޖުގެ މެއިންޓެނަންސް މަސައްކަތް ޗައިނާ ސަރުކާރުގެ ހިލޭ އެހީގައި ކުރިއަށްގެންދިއުމުގެ އެއްބަސްވުމުގައި ސޮއިކޮށްފިއެވެ.
މިއަދު ސޮއިކުރެވުނު މި އެއްބަސްވުމަކީ ޗައިނާ ސަރުކާރުގެ ހިލޭ އެހީގައި ކުރިއަށް ގެންދިއުމަށް ހަމަޖެހިފައިވާ ޗައިނާ މޯލްޑިވްސް ފްރެންޑްޝިޕް ބްރިޖް މަރާމާތު ކުރުމާއި ގުޅޭގޮތުން ދިވެހި ސަރުކާރާއި ޗައިނާ ސަރުކާރާއެކު ސޮއިކުރެވުނު އެއްބަސްވުމެކެވެ.
ޗައިނާ މޯލްޑިވްސް ފްރެންޑްޝިޕް ބްރިޖްގެ މެއިންޓަނަންސް މަސައްކަތްތަކަށް ބޭނުންވާ ވަސީލަތްތައް ތަރައްޤީ ކުރުމަށާއި ބޭނުންވާ ފަންނީ އެހީތެރިކަން ފޯރުކޮށްދިނުމަށް 3 އަހަރުގެ މުއްދަތަށް ޗައިނާ ސަރުކާރާއެކު ސޮއި ކުރެވުނުއިރު، މިއެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރައްވާފައިވަނީ މިނިސްޓަރު ޑރ.އަބްދުﷲ މުއްތަލިބެވެ. ޗައިނާ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޗައިނާއިން ދިވެހިރާއްޖެއަށް ކަނޑައަޅާފައިހުންނަވާ ސަފީރު ވޮންގ ލިޒިންގއެވެ.
މި މައްސައްކަތް ހަވާލު ކޮށްފައިވަނި ބްރިޖްގެ މަސައްކަތް ކުރިއަށްގެންދިޔަ ޗައިނާގެ، ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ސެކަންޑް ހާރބަރ އިންޖިނިއަރިންގ ކޮމްޕެނީ ލިމިޓެޑް (ސީ.ސީ.ސީ.ސީ އެސް.އެޗް.އީ.ސީ) އާއެވެ.
މި އެއްބަސްވުމުގެ ދަށުން ބްރިޖްގައި މިހާރު ދިމާވެފައިހުރި މަރާމާތުތައް ދެނެގަނެ ހައްލުކޮށް، ބްރިޖް މެއިންޓެނަންސް މަސައްކަތްތަކުގެ ރިކޯޑްސް ބަލަހައްޓާނެ ނިޒާމެއް ހަދާ މެއިންޓެނަންސް މައްސަލަތައް ދެނެގަތުމާ ގުޅޭ އެސެސްމެންޓްތައް ހެދުން ހިމެނެއެވެ. އަދި ބްރިޖްގެ މެއިންޓެނަންސް މަސައްކަތައް ކުރުންވެސް ހިމެނެއެވެ.
ކޮންސްޓްރަކްޝަން މިނިސްޓްރީން ބުނެފައިވަނީ މި އެއްބަސްވުމުގެ ދަށުން ބްރިޖްގެ މެއިންޓެނަންސް މަސައްކަތްތައް ކުރުމަށް ދިވެހި ޓެކްނިޝަނުންގެ ޤާބިލުކަން އުފެއްދުމަށްވެސް ވަނީ ހަމަޖެހިފައެވެ. އަދި މި އެއްބަސްވުމުގެ މުއްދަތު ނިމުމުން ބްރިޖް މެއިންޓެނަންސް މަސައްކަތްތަކާއި ހަވާލުވެވޭނެ ފެންވަރަށް ދިވެހިން ބިނާކޮށް މި ޓީމުގެ ބެލުމުގެ ދަށުން މެއިންޓެނަންސް މަސައްކަތްތައް ހިންގޭނެ ކަމަށްވެސް ކޮންސްޓްރަކްޝަން މިނިސްޓްރީން ބުނެފައިވެއެވެ.