އިންޑިއާގެ އެފްކޮންސްއާ ހަވާލުކޮށްގެން ކުރީގެ ސަރުކާރުން ފެށި ތިލަމާލެ ބްރިޖުގެ 35 އިންސައްތަ މަސައްކަތް ނިމިފައިވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި މިނިސްޓަރު މުއްތަލިބު ވިދާޅުވީ ތިލަމާލެ ބްރިޖްގެ މަސައްކަތް 2026 ވަނަ އަހަރުގެ ފަހުކޮޅުގެ ނިޔަލަށް ނިންމާލެވޭނެ ކަމަށެވެ.
މިނިސްޓަރު މުއްތަލިބު ވިދާޅުވީ ތިލަމާލެ ބްރިޖު މަސައްކަތުގެ 35.53 އިންސައްތަ މަސައްކަތް ނިމިފައިވާ ކަމަށެވެ. އަދި ބްރިޖްގެ މަސައްކަތް ހުރީ ޝެޑިއުލަށްވުރެ ކުރީގައި ކަމަށް ވިދާޅުވިއެވެ.
މިނިސްޓަރު ވިދާޅުވީ މި މަސައްކަތުގައި މިވަގުތު އެންމެ ބޮޑު އިސްކަމެއް ދެނީ ޝެޑިއުލާ އެއްގޮތަށް މަސައްކަތް ކުރިއަށް ގެންދިއުމަށް ކަމަށެވެ.
ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ތާވަލުކޮށްފައި އޮތް ގޮތުން މާލެ-ވިލިމާލެ ބްރިޖު ނިންމަން އޮތީ އެންމެ ލަސްވެގެން މިދިޔަ އަހަރުގެ އޮގަސްޓަށެވެ. އަދި ވިލިމާލެ-ގުޅިފަޅު ގުޅާލުމުގެ މަސައްކަތް އަންނަ މަހަށް ނިންމުމަށެވެ. މީގެ އިތުރުން ތިލަފުށި-ގުޅިފަޅު ގުޅާލައި މުޅި ބްރިޖު އެއްކޮށް ނިންމަން އޮތީ އަންނަ އަހަރުގެ ނޮވެމްބަރަށެވެ.
އިންޑިއާގެ އެފްކޮންސްއާ ހަވާލުކޮށްގެން ކުރިއަށްގެންދާ ތިލަމާލެ ބްރިޖަކީ 500 މިލިއަން ޑޮލަރު (6.2 ބިލިއަން ރުފިޔާ) ގެ މަޝްރޫއެކެވެ. މީގެ ތެރެއިން 100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީއެވެ.