2020 ވަނަ އަހަރު ރާއްޖެއަށް އެތެރެކުރި 72 ކިލޯގެ މަސްތުވާތަކެތި އެތެރެކުރުމުގައި އިސްކޮށް ހަރަކާތްތެރިވި މީހެއްކަމަށް ތުހުމަތުކުރާ ސ. ހުޅުދޫ / ދޭލިޔާގެ، އިރުފާން ތަގިއްޔު ބަންދުން ދޫކޮށްލުމަށް ކްރިމިނަލް ކޯޓުން ކުރި އަމުރު ބާތިލުކޮށް އޭނާ ބަންދު ކުރުމަށް ސުޕްރީމް ކޯޓުން އަމުރު ކޮށްފިއެވެ.
72 ކިލޯގެ މަސްތުވާތަކެތި އެތެރެކުރި މައްސަލައިގައި ޑައިފޯމިން ޓްރެފިކް ކުރުމުގެ ކުށުގެ ދައުވާ އުފުލާފައިވާ އިރުފާން ތަގިއްޔު ޝަރީއަތް ނިމެންދެން ބަންދުގައި ބެހެއްޓުމަށްފަހު، މިދިޔަ އަހަރުގެ އޮކްޓޯބަރު މަހު ކްރިމިނަލް ކޯޓުން އޭނާ ބަންދުން ދޫކޮށްލިއެވެ. އެ އަމުރު ހައިކޯޓުގައި އިސްތިއުނާފު ކުރުމުން އޭރު ހައިކޯޓުން ނިންމީ އިރުފާން ބަންދުން ދޫކޮށްލީ ރަނގަޅަށް ނޫން ކަމަށެވެ. އޭގަފަހުން އަނެއްކާވެސް މިދިޔަ އަހަރުގެ ނޮވެމްބަރު 23 ވަނަ ދުވަހު ކްރިމިނަލް ކޯޓުން، ހާލަތު ބަދަލުވެފައިވާ ކަމަށްބުނެ އިރުފާން ތަގިއްޔު ބަންދުން ދޫކޮށްލިއެވެ. ކްރިމިނަލް ކޯޓުގެ މި އަމުރުވެސް މިދިޔަ އަހަރުގެ ޑިސެމްބަރު 5 ވަނަ ދުވަހު ހައިކޯޓުގައި އިސްތިއުނާފު ކުރިއިރު، ހައިކޯޓުން މިފަހަރު ނިންމާފައިވަނީ އިރުފާން ތަގިއްޔު ބަންދުން ދޫކޮށްލާފައިވަނީ ރަނގަޅަށް ކަމަށެވެ.
އެ މައްސަލަ ޕްރޮސިކިއުޓާ ޖެނެރަލްގެ އޮފީހުން ސުޕްރީމް ކޯޓުގައި އިސްތިއުނާފު ކުރުމުން އެ މައްސަލައިގައި ސުޕްރީމް ކޯޓުން މިއަދު ވަނީ ހުކުމް ކޮށްފައެވެ.
މައްސަލައިގެ ހުކުމް އިއްވަވަމުން ފަނޑިޔާރު ހުސްނުއްސުއޫދު ވިދާޅުވީ، ބަންދުގައި ދިގުމުއްދަތެއް ހޭދަވިނަމަވެސް، ނުވަތަ ބަލިހާލަތު ހުރިގޮތުން ނުވަތަ އެނޫންވެސް އެހެން އެފަދަ ސަބަބާހުރެ މުޖުތަމައަށް އެމީހެއްގެ ފުށުން ނުރައްކަލެއް ކޮށްފާނެ މީހަކު ދޫކުރުމަކީ ޤާނޫނުއަސާސީގެ 49 ވަނަ މާއްދާ ދައްކާ މަގު ނޫންކަމަށެވެ. މިހާރު ރާއްޖޭގެ ޖިނާއީ އަދުލުގެ ނިޒާމު އޮތްގޮތުން ބަންދުގައި ގިނަ އަަދަދެއްގެ މީހުން ތިބެންޖެހޭ މައްސަލަތައް ހައްލުކުރެވޭނެ ހަމައެކަނި މަގަކީ ޝަރީއަތުގެ މަރުހަލާ އަވަސް ކުރުންކަން ފަނޑިޔާރު ހުސްނުއްސުއޫދު ފާހަގަކުރެއްވިއެވެ. އަދިއެކަމަށް ދައުލަތުގެ ކަމާބެހޭ ފަރާތްތަކުން، އެކަންކުރުމަށް އެކަށޭނަ މިންވަރަކަށް އިމާރާތާއި މުވައްޒަފުން ވީހާ އަވަހަކަށް ޝަރުއީ ދާއިރާއަށް ހޯދައިދިނުން ކަން ފަނޑިޔާރު ހުސްނުއްސުއޫދު ފާހަގަކުރެއްވިއެވެ.
ފަނޑިޔާރު ހުސްނުއްސުއޫދުގެ ރައުޔުގައި ވިދާޅުވީ ބަންދު މުރާޖާ ކުރުމުގައި އަސްލު މައްސަލައިގެ ޝަރީއަތުގައި ހިނގާ އެއްވެސް ކަމަކަށް ފަނޑިޔާރު ރިއާޔަތްކޮށްގެން ނުވާނެ ކަމަށެވެ. އަދި ބަންދު މުރާޖާ ކުރުމުގައި ފަނޑިޔާރު ބަލަންވާނީ ޤާނޫނުއަސާސީގެ 49 ވަނަ މާއްދާގައި ބަޔާންކޮށްފައިވާ ހާލަތްތަކަށް ބަދަލެއް އައިސްފައިވޭތޯ ކަމަށްވެސް ފަނޑިޔާރު ފާހަގަ ކުރެއްވިއެވެ. ކްރިމިނަލް ކޯޓުން އިރުފާން ތަގިއްޔު ބަންދުން ދޫކޮށްފައިވަނީ ރަނގަޅު ނޫން އުސޫލުތަކަކަށް ބިނާކޮށް ދަށު ކޯޓުގައި އޭނާގެ މައްޗަށް ހިނގަމުންދާ ޝަރީއަތުގެ ނަޒާހަތްތެރިކަން ގެއްލޭނެ މޭރުމަކުން، އަސްލު މައްސަލައިގެ ހުކުމް ކުރުމުގައި ނުވަތަ އެ މައްސަލައިގައި ހުށަހެޅިފައިވާ ހެކިތަކާ ބެހޭގޮތުން ފަނޑިޔާރުގެ ވިސްނުންހުރިގޮތް ދުރާލާ ހާމަވާނެ އުސޫލަކުން ކަމަށް ފަނޑިޔާރު ސުއޫދުގެ ރައުޔުގައި ފާހަގަކޮށްފައިވެއެވެ.
އެހެންކަމުން އިރުފާން ތަގިއްޔު ބަންދުން ދޫކުރުމަށް ކްރިމިނަލް ކޯޓުން ނިންމާފައިވާ ނިންމުމާއި އެ ނިންމުމަށް ހައިކޯޓުން ތާއީދުކޮށް ނިންމާފައިވާ ނިންމުން ސުޕްރީމް ކޯޓުންވަނީ ބާތިލުކޮށްފައެވެ. އަދި އިރުފާން ތަގިއްޔުއަކީ އޭނާގެ މައްޗަށް ކްރިމިނަލް ކޯޓުގައި ހިނގަމުންދާ ޝަރީއަތް ނިމެންދެން ބަންދުގައި ބަހައްޓަންޖެހޭ މީހެއްކަން ނުވަތަ ނޫންކަން، 7 ދުވަހުގެ ތެރޭގައި ކްރިމިނަލް ކޯޓުގައި މައްސަލަ ބައްލަވާ ފަނޑިޔާރު ކަނޑައަޅަންދެން، އިރުފާން ތަގިއްޔު ރިމާޑް ޖަލެއްގައި ބަންދު ކުރުމަށްވެސް ވަނީ އަމުރު ކޮށްފައެވެ. ފަނޑިޔާރު ސުއޫދުގެ ރައުޔަށް ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ. މުހައްމަދު މުހައްމަދު އިބްރާހިމް ތާއީދުކުރައްވާފައިވެއެވެ.