ގއ. މާމެންދޫގައި މީހަކަށް ހަމަލާދިނީ މާލެސިޓީ ޑެޕިއުޓީ މޭޔަރ އަހްމަދު ނަރީޝް ކަމަށް ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ތުހުމަތު ކޮށްފިއެވެ.
އެމްޑީޕީން މިއަދު ބުނެފައިވަނީ ކޮލަމާފުށި ދާއިރާއަށް ޕީއެންސީގެ ފަރާތުން ކުރިމަތިލާ ކެންޑިޑޭޓު އިއްޔަ އެ ދާއިރާގެ މާމެންދޫއަށް ޒިޔާރަތް ކުރުމަށް ހަމަޖެހިފައިވާތީ، އެ ރަށުގައި ހުރި އެމްޑީޕީގެ ބެނަރ ތަކާއި ޕޯސްޓަރުތަކުގައި ފިޔާތޮށި ކުލައިގެ ފޮތި އަޅައި އެމްޑީޕީ ކެންޑިޑޭޓްގެ ކެމްޕޭނަށް ހުރަސްއަޅާފައިވާ ކަމަށެވެ. އެމްޑީޕީން ވަނީ މިކަން ކުށްވެރިކޮށްފައެވެ.
އެޕާޓީން ބުނެފައިވަނީ މިކަމަކީ ނާތަހުޒީބު އަދި ޑިމޮކްރަޓިކް އުސޫލުތަކާ ހިލާފު އަމަލުތަކެއް ކަމަށެވެ. އަދި އެމްޑީޕީގެ ސަޕޯޓަރުންގެ ފަރާތުން އަޑުއުފުލާ ހިޔާލު ފާޅުކުރުމަށްވެސް ސަރުކާރު ހިންގާ ޕާޓީގެ އިސްވެރިންގެ ފަރާތުން ހުރަސްއަޅާފައިވާ ކަމަށެވެ.
"އެގޮތުން، ޕީއެންސީގެ ކެންޑިޑޭޓާއެކު މާމެންދޫ އަށް ގޮސް އުޅޭ ޓީމުގައި ހަރަކާތްތެރިވަމުންދާ މާލެ ސިޓީ ކައުންސިލްގެ ޑެޕިއުޓީ މޭޔަރ އަޙްމަދު ނަރީޝް ވަނީ، ޕީއެންސީގެ މި އަމަލުތައް ކުށްވެރިކުރުމުގައި އުޅުނު ކުއްޖަކަށް ހަމަލާދީފައެވެ. ދައުލަތުގެ އިންތިހާބީ މަގާމެއްގައި ހުރެ، އަދި ސަރުކާރު ތަމްސީލުކުރާ ޕާޓީގެ އިސް ފަރާތެއްގެ ގޮތުގައި ހުރެ ޑެޕިއުޓީ މޭޔަރގެ ފަރާތުން މިފަދަ ދަށު ދަރަޖައިގެ އަމަލުތައް ހިންގުމަކީ އެއްވެސް ދިވެހި ރައްޔިތަކު ބަލައިގަންނާނެ ކަމެއް ނޫނެވެ." އެމްޑީޕީން ބުނެފައިވެއެވެ.
އެމްޑީޕީން ބުނެފައިވަނީ ނަރީޝްގެ އަމަލުތައް ފެނުނު މީހުންގެ މައުލޫމާތާއެކު މައްސަލަ ބަލައިދިނުމަށް އެދި ފުލުހުންނަށް މައްސަލަ ހުށަހަޅާފައިވާ ކަމަށެވެ.
މީގެއިތުރުން އެމްޑީޕީން ވަނީ އެޕާޓީގެ ކެންޑިޑޭޓުންގެ އިންތިހާބީ ހައްގުތަކަށް ހުރަސްއެޅޭ ގޮތަށް ހިންގާފައިވާ މި އަމަލުތައް ވީހާވެސް އަވަހަކަށް ތަހުގީގުކޮށް އަޅަންޖެހޭ ފިޔަވަޅު އެޅުމަށް ފުލުހުންނަށް ގޮވާލާފައެވެ. އަދި އިންތިހާބީ ހައްގުތަކަށް އަރައިނުގަނެ ސުލްހަވެރި ކެޕްމެއިން އެއް ކުރިއަށް ގެންދެވޭނެ މާހައުލު ފަހިކޮށްދިނުމަށްވެސް ސަރުކާރަށް ގޮވާލާފައިވެއެވެ.
މާމެންދޫގައި އިއްޔަ ހިނގާދިޔަ ހާދިސާއާ ގުޅިގެން ނަރީޝް އަދި ފުލުހުންވެސް ބުނެފައިވަނީ ބަޔަކު ނަރީޝަށް ހަމަލާދިން ކަމަށެވެ. އަދި ފުލުހުން ބުނެފައިވަނީ އެ މައްސަލައިގައި މީހަކުވެސް ހައްޔަރު ކުރިކަމަށެވެ.