ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާއިން މަނީލޯންޑާ ކުރިކަމަށް ތުހުމަތުކުރެވޭ މައްސަލައިގެ ތަހްޤީޤު އަވަސްކުރުމާ ގުޅޭގޮތުން މަޝްވަރާކޮށްފިއެވެ.
ޕީޖީ އޮފީހުން މިއަދު ބުނެފައިވަނީ މި މައްސަލަ ތަހުގީގުކުރާ ފުލުހުންގެ އިންވެސްޓިގޭޓަރުންނާއި ޕްރޮސިކިއުޓާ ޖެނެރަލް މިއަދު ބައްދަލު ކުރައްވާފައިވާ ކަމަށެވެ.
މި ބައްދަލުކުރެއްވުމުގައި އެމައްސަލައިގައި މިހާރު ބާކީ ނުނިމި ހުރި މަސައްކަތްތަކަކީ ކޮބައިކަމާއި، އެމަސައްކަތްތައް ނިންމާނެ ގޮތުގެ ވަގުތާ ބެހޭ ގޮތުން މަޝްވަރާ ކުރެވުނުކަމަށެވެ. މިމަސައްކަތުގައި ދައުލަތުގެ އިދާރާތަކުން ބޭނުންވާ އެހީތެރިކަން ހޯދޭނެ ގޮތްތަކާއި، މިމައްސަލައިގައި މިހާތަނަށް ލިބިފައިވާ ހެކިތައް ޕްރޮސިކިއުޓަރ ޖެނެރަލްގެ އޮފީހަށް ހުށަހަޅައި، ޕްރޮސިކިއުޓަރުން އެ ހެކިތައް ދިރާސާކޮށް، އިތުރަށް ހޯދައި ފުރިހަމަކުރަންޖެހޭ ކަންކަމަކީ ކޮބައިކަމާބެހޭ ގޮތުން މަޝްވަރާކޮށް، ގޮތްތަކެއް ނިންމާފައިވާ ކަމަށްވެސް ޕީޖީ އޮފީހުން މައުލޫމާތު ދީފައިވެއެވެ.
މީގެއިތުރުން، މިމައްސަލައިގައި އިތުރަށް ތުހުމަތު ކުރެވޭ މީހުންގެ ބައިތަކުގައި ތުހުމަތު އިއްވައި ބަޔާން ނެގުމާބެހޭ ގޮތުންވެސް މަޝްވަރާ ކުރެވިފައިވުނުކަމަށް ޕީޖީ އޮފީހުން މައުލޫމާތުދެއެވެ. މިބައްދަލުވުމުގައި އެއްބަސްވެވުނީ، ފުލުހުން މިމައްސަލައިގައި ކުރައްވަން ހުރި މަސައްކަތްތައް ނިންމަވައި، ވީހާވެސް އަވަހަކަށް، ދައުވާކުރުމާމެދު ގޮތެއް ނިންމުމަށް ޕީޖީއަށް ހުށަހަޅުއްވައި ދެއްވުމަށް ކަމަށްވެސް މައުލޫމާތުދީފައިވެއެވެ.
އެފްއޭއެމްއަށް އެކި ތަންތަނުން ލިބޭ ފައިސާއަށް ޚިޔާނާތްތެރިވެ، އެފައިސާ ލިބުނު ބޭނުން ފިޔަވައި އެހެން ބޭނުންތަކަށް ބޭނުންކޮށް، އެފައިސާއިން މަނީ ލޯންޑަރ ކުރިކަމަށް ތުހުމަތު ކުރެވިގެން، އެ މައްސަލަ ތަހުގީގު ކުރުމަށް ފުލުހުންނަށް އަމުރުކުރެއްވީ ޕްރޮސިކިއުޓާ ޖެނެރަލްއެވެ. އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް ކޮރަޕްޝަންގެ ބޮޑެތި ތުހުމަތުތަކެއް ކުރެވެއެވެ. މައްސަލަތަކެއް ބަލަމުން އަންނަ ކަމަށް ފުލުހުން ބުނެފައި އޮއްވައި އެފްއޭއެމްގެ ހިންގާ ކޮމިޓީގެ މެންބަރުންތަކެއް އިސްތިއުފާ ދެއްވުމާ އެކު ބައްސާމްގެ މަގާމު ގެއްލުނީ މިދިޔަ މަހުގެ ފަހު ކޮޅެވެ.