އިންޑިއާ ސިފައިން ދިވެހި މަސް ދޯނިތަކަށް އެރި މައްސަލައިގައި ޑިފެންސް މިނިސްޓަރު ޣައްސާން މައުމޫނާ ސުވާލުކުރަން ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާ ކޮށްފިއެވެ.
މިނިސްޓަރު ޣައްސާންއާ ސުވާލު ކުރުމަށް ހުށަހަޅުއްވާފައިވަނީ މެންބަރު ހަސަން ލަތީފްއެވެ.
ހަސަން ލަތީފް މިނިސްޓަރު ޣައްސާންއާ ކުރާ ސުވާލުގައި ބުނެފައިވަނީ، ރާއްޖޭގެ މަސްދޯނިތަކަށް އިންޑިއާ ސިފައިން އަރާފައިވަނީ ރާއްޖޭގެ ސަރަހައްދުގެ އެތެރޭގައިކަން ނުވަތަ ރާއްޖެ ސަރަހައްދުން ބޭރުގައިކަން ކަށަވަރުކުރެވިފައިވޭތޯއެވެ. އަދި އެކަން ހިނގާދިޔަ ގޮތުގެ ތަފްސީލު މަޖިލީހަށް ހިއްސާކުރެއްވުމަށާއި، އެފަދަކަމެއް ތަކުރާރުވިޔަ ނުދިނުމަށް ސަރުކާރުގެ ސިޔާސަތުތަކަށް ގެންނަޖެހޭ ބަދަލުތަކަކީ ކޮބައިތޯ ސުވާލު ކުރައްވާފައިވެއެވެ.
މިނިސްޓަރު ޣައްސާންއާ ސުވާލު ކުރުމަށް ބާއްވާ ޖަލްސާ އެޖެންޑާ ކޮށްފައިވަނީ މާދަމާ ހެނދުނު 10:30 އަށެވެ.
ރާއްޖޭޭގެ މަސްދޯނިތަކަށް އިންޑިއާ ސިފައިން އެރި މައްސަލައިގައި މީގެކުރިން ޣައްސާން ވަނީ މަޖިލީހުގެ 241 ކޮމިޓީއަށްވެސް ހާޒިރުކޮށްފައެވެ. އެހެންނަމަވެސް އެ ބައްދަލުވުން ކުރިއަށްގެންގޮސްފައިވަނީ ސިއްރު ކޮށްގެނެވެ.
މި މައްސަލައިގައި ޑިފެންސް މިނިސްޓްރީން މީގެކުރިން ނެރުނު ބަޔާނެއްގައި ބުނެފައިވަނީ ރާއްޖޭގެ ހާއްސަ އިގްތިސާދީ ސަރަހައްދުގެ ތެރޭގައި މަސްވެރިކަން ކުރަމުންދިޔަ ރާއްޖޭގެ މަސްދޯނިތަކަށް އަރާފައިވަނީ އިންޑިއާގެ ކޯސްޓްގާޑު ޝިޕް 246 އަދި އިންޑިއާ ކޯސްޓްގާޑް ޝިޕް 253 އަށް ނިސްބަތްވާ ބޯޑިން ޓީމުތަކަކުން ކަމަށެވެ. ރާއްޖޭގެ ހާއްސަ އިގްތިސާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަށް ރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއް ނެތި ބައިނަލްއަގުވާމީ ކަނޑުގެ ގާނޫނުތަކާއި އުސޫލުތަކާ ހިލާފަށް އިންޑިއާގެ އަސްކަރިއްޔާ އިން ހިންގި އޮޕަރޭޝަންގެ ތަފްސީލު ދިނުމަށް ރާއްޖޭގެ ހާރިޖީ ވުޒާރާ މެދުވެރިކޮށް އިންޑިއާ ސަރުކާރުގައި ރަސްމީކޮށް ދަންނަވާފައިވާނެ ކަމަށް ޑިފެންސް މިނިސްޓްރީން ބުނެފައިވެއެވެ.