ރާއްޖޭގެ ކަނޑުގެ ސަރަހައްދު ބެލެހެއްޓުމަށް މިފަހުން ގެނައި ޑްރޯންތައް ގަތުމުގެ ތަފުސީލުތައް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހާމަކުރައްވާނެ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ޣައްސާންއަށް ސުވާލުކުރުމަށް ލިބުނު ފުރުސަތުގައި މެންބަރު ހަސަން ލަތީފް ވަނީ ޑްރޯންތައް ގަތް އަގު އަދި ޑްރޯންތަކުގެ އަދަދު ހާމަކުރެވިދާނެތޯ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން މިނިސްޓަރު ޣައްސާން ވިދާޅުވީ އެއްވެސް ގައުމެއްގައި ދިފާއީ ގޮތުން ކުރާ ހަރަދުތަކުގެ ތަފްސީލުތައް އެގޮތަށް ހާމަނުކުރާ ކަމަށެވެ. އެހެންކަމުން އެ މައުލޫމާތު ރައްޔިތުންގެ މަޖިލީހުގެ ޖަލްސާއެއްގައި ހާމަކުރުމަށް އުޒުރުވެރިވާ ކަމަށް ވިދާޅުވިއެވެ.
ޣައްސާން ވިދާޅުވީ ރައްޔިތުންގެ މަޖިލީހުގެ 241 ކޮމިޓީގައި ސިއްރު ޖަލްސާއެއްގައި މި މައުލޫމާތު ހާމަކުރެވިދާނެ ކަމަށެވެ.
މީގެއިތުރުން މިނިސްޓަރު ޣައްސާން ވިދާޅުވީ ޑްރޯން ގަނެފައިވަނީ ރާއްޖޭގެ ގާނޫނުއަސާސީއާއި ގާނޫނުތަކުން އަދި ގަވައިދުތަކުގެ ދަށުން ދެފުށްފެންނަކަން ކަށަވަރުކުރުމަށް ކަނޑައަޅާފައިވާ އުސޫލުތަކުގެ ތެރެއިން ކަމަށެވެ. އަދި ތަހުގީގީ އިދާރާތަކުން ބައްލަވަން ބޭނުންފުޅުވާނަމަ މިކަމުގެ ލިޔެކިޔުންތައް ހުންނާނެ ކަމަށްވެސް ވިދާޅުވިއެވެ.
މިނިސްޓަރު ޣައްސާން ވިދާޅުވީ ދިވެހިރާއްޖޭގެ މިނިވަންކަމާއި، ސިޔާދަތާއި، އިސްތިގުލާލު ހިމާޔަތްކުރުމަކީ ދިވެހިން ކުރަންޖެހޭ ކަމެއް ކަމަށެވެ.