ދައުލަތުގެ ސިއްރުތައް ހިފެހެއްޓުމާ ބެހޭ ގާނޫނެއް އެކުލަވައިލަންޖެހޭ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ވަނީ ޑްރޯންތައް ގަތުމާ ގުޅޭގޮތުން މިނިސްޓަރު ޣައްސާންއަށް ސުވާލުކޮށްފައެވެ. އެގޮތުން ކުރިމަތިކުރި ބައެއް ސުވާލުތަކަށް މަޖިލީހުގެ ތަޅުމުގައި ޖަވާބުދާރީވުމަށް އުޒުރުވެރިވާކަން މިނިސްޓަރު ފާހަގަކުރެއްވިއެވެ.
މެންބަރުން ކުރި ބައެއް ސުވާލުތަކަށް ޖަވާބު ދެއްވަމުން މިނިސްޓަރު ޣައްސާން ވިދާޅުވީ، މައުލޫމާތުތައް ރައްޔިތުންގެ މަޖިލީހަށް އެންމެ ފުރަތަމަ ހާމަކުރުމަށްޓަކައި، ސިއްރުތައް ހިފެހެއްޓުމާ ބެހޭ ގާނޫނެއް އެކުލަވައިލަންޖެހޭ ކަމަށް ސަރުކާރުން ދެކޭކަމަށެވެ.
އެގޮތުން ކްލެސިފިކޭޝަން ލެވެލްތަކެއް ލުމަށްފަހު ދައުލަތުގެ އެކިވަރުގެ ސިއްރުތައް ހިފެހެއްޓޭނެކަން ކަށަވަރުކުރުމަށް ޤާނޫނެއް އޮތުން މުހިންމު ކަމަށް މިނިސްޓަރު ވިދާޅުވިއެވެ. މިފަދަ ނިޒާމެއް ގާއިމު ކުރެވުމުން ސަރުކާރުން އެފަދަ ކަންކަމުގައި ގެންގުޅޭ އެކިއެކި ސިޔާސަތުތައް މަޖިލީހާ ހިއްސާކުރަން ފަސޭހަވާނެ ކަމަށާއި އޭރުން ދައުލަތުގެ ސިއްރުތައް ސިޔާސީ ބޭނުމަށް ހާމަނުކުރާނެ ކަމުގެ ޔަގީންކަން އޮންނާނެ ކަމަށެވެ.
ޣައްސާން ވިދާޅުވީ އެފަދަ ނިޒާމެއް ކަށަވަރު ކުރުމަށް މަޖިލީހުގެ 241 ކޮމިޓީއާއެކު މަޝްވަރާ ކޮށްފައިވާ ކަމަށެވެ. އަދި މިގޮތަށް އެކުލެވޭ ޤާނޫނެއްގެ ތެރެއިން ސިއްރުތައް ހާމަކުރުމަކީ ޖިނާއީކުށެއް ކަމަށް ކަނޑައަޅައި އެ މަސްއޫލިއްޔަތު ޒިންމާދާރު މީހުންނާ ހަވާލުކުރަންޖެހޭ ކަމަށެވެ.