ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އަލުން ވާދަކުރަން ބޭނުންވެ، ހިތަދޫ މެދު ދާއިރާގެ މެމްބަރު އަހުމަދު ރަޝީދުގެ ފަރާތުން ހައިކޯޓަށް ހުށަހެޅި މައްސަލަ ބަލައިނުގަންނަން އެ ކޯޓުން ނިންމައިފިއެވެ.
އަޙްމަދު ރަޝީދު އެ މައްސަލަ ހައިކޯޓަށް ހުށަހަޅާފައިވަނީ މިމަހުގެ 14 ވަނަ ދުވަހުއެވެ.
ހައިކޯޓުގެ ވެބްސައިޓުން ދައްކާގޮތުން އެކޯޓުގެ ރަޖިސްޓްރާ ނިންމަވާފައިވަނީ އެ މައްސަލަ ބަލައިނުގަތުމަށެވެ.
މައުލޫމާތު ލިބިފައިވާ ގޮތުގައި އެ މައްސަލަ މެމްބަރު ރަޝީދު ހުށަހެޅުއްވީ އިންތިހާބު ބާއްވާ ތާރީހަށް ބަދަލު ގެނައުމުން އިންތިހާބުގައި ވާދަކުރުމަށް އިތުރު ފުރުސަތެއް ދޭން ޖެހޭނެ ކަމަށް ބުނެއެވެ.
ދަ ޑިމޮކްރެޓްސްގެ ޓިކެޓުގައި ހިތަދޫ މެދު ދާއިރާ އަށް ވާދަކުރައްވަން މެމްބަރު ރަޝީދު ނިންމެވި ނަމަވެސް ފަހުން ވަނީ ނަން އަނބުރާ ގެންދަވާފައެވެ.
އަންނަ މަހުގެ 21 ގައި ބާއްވާ މަޖިލިސް އިންތިހާބުގައި ހިތަދޫ މެދު ދާއިރާ އަށް ވާދަކުރައްވަނީ ދެ ކެންޑިޑޭޓުންނެވެ. އެއީ އައްޑޫ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ޝުއާއު އާއި ޕީއެންސީގެ ކެންޑިޑޭޓު އަހުމަދު އަޒާންއެވެ.