ކުރީގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހަށް ހިއްސާކުރާނެ އިތުރު މައުލޫމާތު އެބަހުރިކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވުމުން އެ މައުލޫމާތު ރައްޔިތުންގެ މަޖިލީހަށް ހޯއްދަވައިދެއްވުމަށް އެދިއްޖެއެވެ.
މަޖިލީހުގެ މެންބަރު އިމްތިޔާޒް ފަހުމީ ސޮއިކުރައްވާ ރައްޔިތުންގެ މަޖިލީހުގެ ރައީސް މުހައްމަދު އަސްލަމްއަށް ފޮނުވި ސިޓީއެއްގައި ވަނީ، ބޮމުގެ ހަމަލާއާގުޅޭ އިތުރު މައުލޫމާތު ހުރިކަމަށް މިނިސްޓަރު ޣައްސާނު ވިދާޅުވިކަން ފާހަގަކުރައްވާފައެވެ.
އިމްތިޔާޒް އެދިވަޑައިގެންފައިވަނީ އެ މައުލޫމާތު ރައްޔިތުންގެ މަޖިލީހަށް ހޯއްދަވައިދެއްވާ، އެ މައުލޫމާތުގެ އަލީގައި ކަމާބެހޭ ކޮމިޓީން އެ މައްސަލަ ބައްލަވައި ދެއްވުމަށެވެ.
Today during Question t Time, I inquired about the terrorist bomb attack targeting fmr Speaker @MohamedNasheed. Minister of Defense disclosed that the govt has acquired additional info about the incident.I have formally written to the sitting Speaker to obtain it to probe. pic.twitter.com/JtwYY9lUNe
— 𝐈𝐦𝐭𝐡𝐢𝐲𝐚𝐳 𝐅𝐚𝐡𝐦𝐲 (@Imthiyazfahmy) March 25, 2024
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ޣައްސާން ވިދާޅުވީ ރައީސް ނަޝީދަށް ދިން ބޮމުގެ ހަމަލާގެ މައްސަލަ ވަރަށް ގާތުން ބަލަމުން ގެންދަވާނެ ކަމަށެވެ. އަދި މިހާރު ފެނިފައިހުރި ކަންތައްތަކުގައި މި މައްސަލައިގައި ރައްޔިތުންގެ މަޖިލީހާ ހިއްސާކުރާނެ އިތުރު މައުލޫމާތު ދިފާއީ ވުޒާރާގައި އެބަހުރި ކަމަށްވެސް ޣައްސާން ވިދާޅުވިއެވެ. އެހެންނަމަވެސް އެ މައުލޫމާތު ހިއްސާ ކުރެވޭނީ މަޖިލީހުން އެ މައުލޫމާތު ހޯއްދަވަން މަސައްކަތް ކުރެއްވުމުން ކަމަށް ވިދާޅުވިއެވެ.
މޭ 6 ވަނަ ދުވަހު ބޮމެއް ގޮއްވާލާ ރައީސް ނަޝީދަށް ދިން ހަމަލާގައި އެމަނިކުފާނަށް ބޮޑެތި އަނިޔާތަކެއް ލިބިވަޑައިގަތެވެ. އަދި އެ ހަމަލާއިން ލިބުނު ޒަހަމްތަކަށް ރާއްޖެއާއި ރާއްޖެއިން ބޭރުން ފަރުވާ ހޯއްދަވާފައިވެއެވެ.
މޭ 6 ބޮމުގެ ހަމަލާއާ ގުޅިގެން ދައުވާ އުފުލާފައިވަނީ މުޖާޒް އަހުމަދު، ތަހުމީން އަހުމަދު، އަލީ ހައިޝަމް، ފަހުމީ އަލީ، އިސްހާގް އަދި މުހައްމަދު ނާޒިމްގެ މައްޗަށެވެ. މި ހަމަލާގައި ބޮން ގޮއްވާލި ވ. ތިނަދޫ، ހިޔާ، އަދުހަމް އަޙްމަދު ރަޝީދު ވަނީ ކުށަަށް އިއުތިރާފުވެފައެވެ. އެހެންކަމުން އޭނާގެ މައްޗަށް ކުށް ސާބިތުވެ ވަނީ 23 އަހަރުގެ ޖަލު ހުކުމެއް އިއްވާފައެވެ.